HIV+ve hmu chhuak tura ṭan tlân a ṭul

Special Committee on Resolute Action Against HIV/AIDS hotute August 25, 2026-a MSACS pisaa an ṭhutkhawmnah, Mizoramah HIV Estimation & Prevalence (HIV vei mek awm tura ngaih zat leh tun dinhmun) thlirin, Mizoramah HIV vei si, an vei a ni tih inhre lo mi 3,000 chuang an awma ngaih a ni tih tarlan a ni.

Mizorama HIV+ve ni si, la hmuh chhuah loh mi 3,000 chuang an awma ngaih a ni hi a dik thei a, a dik chiah lo thei bawk. Finfiahna a awm lo a, hriat chian a nih miau loh avangin a zat dik tak hriat theih a ni lo.

HIV/AIDS dona lama hma latu, a taka luhchilhtu leh zir chiangtute'n uluk taka an zir chianna aṭanga an hmuh dan a ni a, zaa zain a dik kher lo a nih pawhin, Mizoramah HIV+ve ni si, mahni inhre lo tam tak an awm a ni tih hi pawm mai ila a ṭha.

Mithiamte'n an sawi danin, HIV hi tihdam theih a ni lo a, thunun theih a ni. Tihdam theih loh a nihna lai hi a hlauhawm bikna a ni. HIV kai, mahni inhre si lote hi hmuh chhuah tawhte aiin an hlauhawm hle zawkin a rinawm. An inhriat loh avangin fimkhur nachang an hre dawn lo a, awlsam takin mi dang an kai chhâwng ngei ang, mi tam tak an lo kai chhâwng tawh mai thei bawk.

HIV+ve ni si, la hmuh chhuah loh leh finfiah lohte hmuh chhuah an nih vek theih nan theihtawpa ṭan tlàn a ṭul. Inringhlel miah lo, thisen endiknaa HIV+ve lo ni ta si tam tak an awm tawha sawi a ni; hei hian inringhlel lote pawhin mahni inhriat chian nan thisen an endiktir a ṭulzia a tilang. HIV+ve kai leh kai loh hre tura thisen endik hi a zahthlak loh a, mi tinin kan hreh lo a ṭul - kan ṭhat tlàn zawkna tur a ni.

Mi tinin HIV/AIDS chungchang an hriat chian theih nan te, HIV/AIDS veite laka rilru dik put dan turah leh thil dang dangah HIV/AIDS do hna thawk tura rawihte leh sorkarin inzirtirna nasa lehzuala hma an lak sauh sauh a ngai e.