Kut hnathawktute tana remchang siam

Chief Minister leh Excise & Narcotics department hotute August 19, 2026-a ṭhukhawm chuan, Mizoram Liquor (Prohibition) Amendment Act, 2025 hnuaiah mi/firm 11 hnenah Mizorama thlai/thei thar hmanga beer siam phalna pek an remti.

Tarlan danin, MLP Amendment Act, 2025 hnuaiah hian Mizorama thlai/thei thar hmanga siam beer (local fruit beer) siam dilna 96 leh winery din dilna pathum endik a ni a; local fruit beer siam dilna 11 pawm niin, dilna dang 13 chu endik leh phawt tura dah a ni. CM chuan, kut hnathawktute chu an ngaih pawimawh hmasak ber an nih thu a sawi.

CM-in kut hnathawktute chu an ngaih pawimawh hmasak ber an nih thu a sawi hi a lawmawm a, kut hnathawktute an hlâwk zawk theihna tura sorkarin hma a la hi a tih tur tak a ni. Eizawnna hna chi hrang hrang a awm a, chungah chuan kut hnathawka eizawng kan tih ang chi hi Mizorama a tam ber an ni; chutiang mite ngai pawimawha sorkarin ngaihtuahna a sêng hi a ṭha hle.

Sawhthing, balhla, chawngthei (dragon fruit), sapthei, lakhuihthei, sunhlu, káwlthei, theiheráwt, fú, làmkhuang, dawnfawh, hmazil leh a dangte hmanga beer siam a ni tur hi a lawmawm a; mipui, a bikin kohhran lam pawhin hriatthiamna zau tak an neih a ngai àwm e.

Kut hnathawktu tam tak chu hah leh rim taka thawk chunga hmasawn hlei thei lo, rethei taka awm rengte an ni a, an thawh hah dan leh an lak luh a inhen tâwk lo ṭhin. Mizorama thei leh thlai thartute'n hlâwk zawka an hralh theihna tura sorkarin remchang a siam hi a ṭha em em. Leilung behchhana eizawng mi tam takte hmasawnna tur ngaihtuah hi a pawimawh tak zet a, sorkar pawhin nasa lehzuala hma a lakna tur a ni.

Dan hnuaia phalna neia Mizorama thar thei leh thlai hmanga beer siam tumna hi a lo hlawhtling ta a nih pawhin, a siamtute'n thianghlim takin, hriselna atana pawi lo turin an siam tur a ni a; food safety standard-in a phal chin huam chhungah an siam ngei tur a ni ang.