Covid-19 inkaihhruaina thar ber

Mizoram sorkar chuan mipuite Covid-19 laka an him theihna tur leh hripui darh zel tur venna turin January 16, 2021 khan ruahmanna thar a siam a; February aṭangin chhun lamah biak-ina inkhawm a theih tawh dawn a, zan lama pawn chhuah phal loh kalpui zel a la ni dawn. Infiamna lamah inelna kalpui theih dan duan a nih bakah sikul naupang lut thei bik tur bithliah an nia, inkaihhruaina hmasa aiin kawng hrang hrangah mipui an zalen hret dawn. 

Khawpuia zan lama chhuah phal loh dar 8:00 hnu lam tih ṭhin chu dar 8:30 hnu lamah tawlh hret a ni a, Pathianniah lirthei tlan chhuah phal loh a la ni. Hei hian sawisel a hlawh zui leh hle ang tih a rin theih a; nimahsela he inkaihhruaina siamtu lam ngaihtuahna aṭang chuan thil ṭha tak a ni ngei ang. 

Hripui a la len miau avangin duhthusamah chuan tumah hi chhuak loin inkhung ila, fimkhur takin awm reng ila a ṭha ang; nimahsela ei zawn a ngai a, loh theih loh avangin kan chhuah a ngai. Thawhṭanni aṭanga Inrinni thlengin eizawnna hna kan thawhna hun a awm a, chhun lamah mi tam zawkin ei an zawn avangin chhun lamah chuan inkhuahkhirhna hranpa vak nei loin mipui pawh an zalen. Zan lam erawh ṭul bik thil ni lem loah chuan ina awma pawna lên chhuah loh theih hi thuneitu lam duh dan a ni; mipui harsatna siamsaka khuahkhirh tumna lam aiin mipui himna ngaih pawimawh vang a ni zawk ang.

Infiamna (sports) lam pawh hi puipun lian tham buatsaih lo zawnga kalpui a ṭha a, inelna (tournament) kalpui phalsak ni tawh mah se zawm tura an dan siam (SOP) hi a la khirh em em mai a, "Inelna kalpui an phal tawh alawm," tia ke pen nghal mai chi niin a lang lo a; sorkarin mipui kaihhruaina a siam hi ngun taka chhiarin, Mizoram tan chuan zawm harsa tak vek mai a la ni a, hei vang hian sorkar lam pawh a la fimkhur hle tih a thuchhuahah hian a lang. 

Sorkar tan pawh ngaihtuah thiam harsa khawpin he hripui hian min tibuai a, vawiina ṭha kha naktukah a ṭha tawh lo thei a, inkaihhruaina ṭha tak nia hriatte pawh rei lo teah thlak zung zung a ngai fo a ni. Hei vang hian thuneitu lamin kan zavaia ṭhat tlanna tur a nih beiseia ruahmanna an siamte hi zawm tum ṭheuh ila a ṭha hle ang.