Krismas leh thilpek

December 25 hi Kristiante tana hunpui ber Krismas a ni a, he ni hi Mizote ni ngaih pawimawh ber ang pawhin a chhal theih awm e. Krismas hi mahni tana thil thar neihna hun a nih rualin mi tam tak chuan thilpek pekna hun ṭhaah an hmang ṭhin.

Tun hnaiah Mi-zote pawhin mi harsa zawkte hnena thilpek pek kan intihhmuh ṭan ta a, a lawmawm khawp mai. Khawsak din-hmun hi a inthlauh tawh em avangin ṭanpuina thinlung putu tan chuan ṭanpui ngai hi hmuh tur an awm zel a ni.

Krismas hi Kris-tiante tana a hlutna chu khawvel sual tana Pathianin a fapa a lo tirhna hun a ni a, Pathianin mihringte a takin thilpek min pekna ni a ni. He ni kan lawm hian mahni tana hamṭhatna maiah duhtawk loin, Krismas hi midangte tana thilpek pekna remchangah i chantir zel ang u.

Mizo zingah midangte ṭanpuina pe reng ṭhin mi ṭha-hnem tak an awm a, hnuchham chenna inte pawh a viltu ang maia awma mahni inpuang ngai reng reng lo mi tlawmngai an awm. Hetihlai hian tun hnaiah mahni inpholang zawnga thilpek pek kan intihhmuh ve mek bawk a, hengte hi ṭha thawkhat mah se mirethei zawkte nihna pholang zawnga kalpui loh a ṭha hle.

Thilpek kan peka-te hmel leh inte van-tlang hmuha pholang zawng lo hian thilpek hi a inpek theih hmel a, mi retheihna leh khawngaihthlakna tak mipui hmaa puan-zar chiam hi pum-pelh thei ni se a ṭha khawp mai.

Thilpek chu eng ang chi pawh ni se kan intihhmuh zel tur a ni a, a puanzar danah erawh fimkhur tlang ila, a dawngtu turin an dawn tawh piah lamah a petute lang tur zawnga beih vakte pawh hi nakinah chuan kan la kal pel ve mai ang.