Zirtirtute inpekna thar neih ní ni se
Zirtirtute Ni - Teachers' Day hman a lo ni leh ta. Kumina Teachers' Day - September 5 hi chawlh ní a nih avang leh, September 4 & 6 pawh chawlh a nih avangin September 3 khan hmun hrang hrangah hman a ni a; thlalakte social media-ah hmuh tur a tam a, a hmuhnawm a, hlim takin an hmang tih a hriat theih.
Zirna-in hrang hranga Zirtirtute Ni hmangtu zawng zawngte'n an hun hmante kha zirtirtute pawimawhzia an hriat tharna ní ni ngei se a duhawm. Zirlaite'n zirtirtute hlutzia, thiamna petu leh an nun kawng hruaitu an nihna te hriat chian lehzual phah se; zirtirtute pawhin an hnaa inpek tharna ní atan hmang ṭangkai ngei rawh se.
Teachers' Day apiangin National Teacher Award hlan ṭhin a ni a; kuminah pawh Delhi-ah hlan niin, hlan zingah Mizo nu pakhat a tel. India rama zirtirtu ṭha thlan chhuah leh chawimawi zingah Mizo nu a tel hi a lawmawm tak zet.
Kumina India ram pum huapa zirtirtu ṭha chawimawina dawngtu Mizo nu-ah hian zir tur leh entawn tlak tam tak a awm ngei ang. Award dawng tura thlan a nih chhante a zirtirtupuite'n zir chiang se, amaha entawn tur awm apiangte entawn se, a tih ṭhin zinga tih ve atana ṭhate chu mahni sikul ṭheuhah tih ve tum se. Chu chu Mizo nuin chawimawina a dawn aṭanga zirtirtu dangte leh sikul dangte'n an hlâwkpui tur a ni.
Mizoram sorkara zirtirtute zingah an thawhna sikula an fate kaltir duh lo a, sikul dang, a bikin private school-a kaltir an tam hle. Hei hian a lantir chian em em chu - a sikul, naupang a zirtirna ngei kha chhia a ti a, a fate zirna tlakah a ngai lo tihna a ni a; mahni intimualphona chi khat a ni. Mahni thawhna sikul, mahni fate zirna tlâka ngai lo zirtirtute hi an inenfiah a ṭul a, an ṭan hle a ngai tih a lang.
Kumina Zirtirtute Ni an lawm hi a nawmna leh hlimawmna ringawtah tawp lo se; zirtirtu zawng zawngte'n zirtir hna an thawhnaah inpekna leh taimakna nasa zawk an neih tharna ní atan hmang ngei se. A bik takin sorkar sikula thawkte'n an ṭan lehzual a, an taimak lehzual a ngai a ni tih an hriat tharna ní lo ni mawlh rawh se.