Hnathawh tum sorkar
Mizoramah sorkar thar a piang ta a, Krismas leh Kumthar vuakvetah pawh chief minister leh minister-te che vel hmuh tur a tam hle a, mi tam takin chawlh an hmanlaiin chawlh hmang loin hna an thawk niin a lang.
Kum 10 chhung Congress kaihhruaina hnuaiah sorkar a kal a, kan thlen chin chu tuna kan dinhmun hi a ni. Kawng ṭhenkhatah hmasawnna hmuh tur awm bawk mah se, mipui duhkhawp a ni lo tih a lan chianna chu vote-ah a ni. MNF pawh hian kum 10 hmalam khan kum 10 chhung ro an rel tawh a, anni pawh an rorel danin a zir lo a ni ngei ang, mipuiin mualpho takin an lo paih tawh a ni.
Tuna sorkar thar lo piang hian an tihsualah ngaihdam an dil tawh a, ṭha taka langtlang sorkar siam tumin ṭan an la dawn tih an sawi. An insawi ang ngeia hnathawh an tum tih lantirin PWD changtu chief minister chuan December 27 leh 28, 2018 khan Aizawl traffic jam tihzia awm dan tur leh Khamrang lama NH-54 kawngpui siamṭhat dan tur a enfiah. He hunah hian a ṭawiawmtu zingah NPEC Consultancy Ltd., Delhi hotute'n an tel.
Thil chik deuh ngai erawh chu CM-in fly over siam dan tur a en ṭuma consultancy firm pakhat an lo lang nghal nawlh mai hi a ni. Sorkar an din hlim hlawl a ni a, krismas chawlh a awm bawk nen hnathawhna hun ṭha pawh a la awm mang lo a, chutihlaia Delhi aṭanga consultancy firm lam an rawn lang thei nghal mai hi ‘langtlang sorkar’ hian an sawifiah nghal chu a ṭha awm e.
Tun hmaa sorkarna siam tawhten hna an neih hma aṭanga ‘thawktu hual’ an nei ang mai mai khan an kal leh ang tih a hlauhawm a, heng hmalakna tura ruahmanna awmte hi dan ang thlapa tender la siama bawhzui chi a nih hmel lai a, a tir aṭanga consultancy firm lamin an vil nghal rûn mai chuan kan buaina ngaiah bawk kan buai chhunzawm leh palh ang tih a hlauhawm hle a ni.
Congress kaihhruai sorkar khan department ṭhenkhatah midang inrawlh ve theih loh khawpin firm ṭhenkhat kha an voh bik a, a project siam aṭanga a hmawrbawktu thlengin an invulh a, chu chu an party pawhin an tawrh phah niin a lang. MNF pawh hian hnathawh tuma bul an ṭannaah hian an dai sual lohna turin fimkhur takin ke pen se a duhawm hle.
Hnathawh tum sorkar kan nei dawn niin a lang a, an hnahthawh danah fimkhur se, hnathawktu tur thlan danah dik takin kal se, Mizoram tan theihtawp chhuah zel rawh se.