Zirlai pawl bawk an chet a ngai leh dawn

Mizo Zirlai Pawl (MZP) General Headquarters chuan tun hnai khan Dawrpui Multipurpose Hall-ah inkhawmpui vawi 64-na an hmang a, an thu rel zingah chak leh zuala ramri chinfel a nih theih nana hmalak a rel a; kum 2019-2021 hruaitu tur an thlang bawk. 

Ramri thil a nih tawh chuan zirlai pawlte hi hma latu an ni deuh zel a, tun hnaia ramri chung­changa thil thleng hrang hrangah pawh zirlai pawlte tel lo chuan awmzia a nei meuh lo a ang ber. Anni hian ramri hi an vei a, a chinchang an hre bawk a, a takin an thawk chhuak ṭhin bawk. 

Congress-in sorkarna vawn fung an chelh laiin Zophaiah thil thleng a awm a, MZP hruaitute hi a hmatawngah an ṭang ngam a, a tawrh pawh an tuar hle tih a takin kan hmu. Hetihlaia eptu pawl lam MNF-a an MLA ṭhenkhatte khan a hmunah an tlawh a, ramri humhalh an duh thu huaisen takin an sawi a, a video-te pawh hmuh tur a la awm. 

Sorkarna a inthlak ta a, tunah MNF lamin rorelna vawn fung an chelh ve ta thung a. Ramri chungchangah council of ministers meeting meuhin an pawm chinte an rel fel tawh. A taka an hmalak dan leh kan thlen chin chu kan hre vek a ni. Hei vang hian MZP in ramri chinfel tuma hmalak an rel hi a lawmawm a, a tawpkhawkah chuan zirlai pawlah bawk kan innghat leh nge nge dawn a ang ber.