Bawlhhlawh thliarah ṭang rual ila

Aizawl khawpuiah Solid Waste Management Rules, 2026 a taka kalpui ṭan mek a ni a, Aizawl Municipal Corporation ward 19 zinga ward pasariha kalpui ṭan turin September 17, 2026 khan UDPA Minister-in a hawng.

SWM Rules, 2026-ah hian bawlhhlawhte chu chi li - ṭawih thei (wet), ṭawih thei lo (dry), sanitary waste (diaper, napkin, etc) leh special care waste (electronic thil, etc)-ah te thliar tur a ni a, chhungkaw tinin bawlhhlawh báwm pali an neih a ngai.

Dan thar anga bawlhhlawh chi lia thliar hi enchhinna atan AMC-a ward pasarihah kalpui ṭan turah hian bawlhhlawhte chu chhungkaw tin aṭangin a khawntute'n an la khawn dawn a; bawlhhlawh thliar a nih leh nih loh pawh a paihna - Solid Waste Management Centre-ah endik ṭhin a ni dawn.

Bawlhhlawh chi lia thliar turah hian local council-te an pawimawh hle dawn a; LC-te'n an veng ṭheuhah tihhlawhtlin ngei tumin hma an lak a ngai ang. SWM Rules hi dan a nih avangin khawng taka kalpui a ṭul dawn a, khawng taka kal tur chuan mipuiin an hriatthiam hmasak a ngai a, inzirtirna an uar a ṭul ang.

Mipui, chhungkaw tinte pawhin an tih hram hram a ngai dawn. SWM Rules hi thil thar a nih avangin a nih dan tur ang taka kal a harsatna lai a awm ang a, harsatna eng eng emaw a la thleng chho ngeiin a rinawm.

Harsatna a awm a nih pawhin mi tinin kan hriatthiam a ngai ang a, a nih dan tur ang taka kal a harsa rih a nih pawhin, hnual mai loin, chhungkua ṭheuhah kan thliar hrâm hrâm a ṭul ang.

Bawlhhlawh thliar dan tur dik tak hi chhungkaw tin tan hriat chian nghal a harsa ang a, hrethiam mai lo tam tak an awmin a rinawm. Khawvel changkang zelah kan hma lama kan kalphung tur, hmasawnnain a ken tel leh changkànna lam panna a nih avangin mipuiin hriat chian kan tum ve tur a ni.

Faina hi mimal, chhungkua, veng, khua leh ram changkan leh changkan loh tehna hmasa leh langsar a ni a; kan changkan theih nan kan fai a ngai a, faina hi kan nunah a beh tlat theih nan kan insiamrem zel a ṭul e.