Ram páwnah nun dan uluk a țul

Calcutta Mizo Welfare Association (CMWA) chuan tun hnai khan thuchhuah an siam a; Kolkata leh a chhehvela Mizo awmte chu an inchei danah te, cheziaah leh tawngkamah te Mizo hnam leh Kristianna timualpho thei zawnga awm lo turin an chah.

Mizote chu Kolkata leh a chhehvelah Zo nun ze mawi - tlawmngaihna, aia upa zahna, hawihhâwmna, rinawmna, taimakna leh huaisenna lan chhuahtir tur te, nupa ni si loa nupa anga khawsa lo tur te, Mizo thil tihnaa tel thin turtein an chah bawk.

CMWA-in Kolkata leh a chhehvela Mizo awmte an ngenna hi a pawimawh tak zet a; hna leh zirna vanga phaia awmte mai bakah, zin veivâk ten zâwm vek thei ila a duhawm.

Mizote leh hmarchhak mite hi India rama hnam dangte'n min hre sâwt ve viau mah se, mi náwlpui chuan min la hmelhriat lo hle; mi náwlpui chu sawi loh, lehkha zir sang tak tak zingah pawh Mizo leh Mizoram la hre lo hrim hrim an tam hle a ni. Hei vang hian hmél, pianhmang, chezia leh nunphunga kan danglamna hi a langsâr țhin.

Mizorama chhungte leh lainá te, thenawm khawvengte leh min hre chiangtute hmuh phak lohna state páwna awm chiah hian zalên ta riaua inngaihna hi thalai lehzualte zingah a awm duh viau thin. Chu zalenna chu mi tam takin an hmang thiam lo fo a, nun chhiat phah pawh tam tak an lo awm tawh.

India ram khawpui lian hoah hian nula tlangval, nupa ni si loa riak dûn mai thin an awm fur thei a; Mizoramah an rawn hawa, kohhran, thalai pawl leh khawtlang thil tihnaah tha taka tel ve leh mai thin pawh eng emaw zat an awm thei. Hetiang hi thil thleng ve fo a nih avangin, Mizoram páwna an khawsak dan kimchang tak hriat harsa viau mah se, nu leh pate'n an fate an vil that viau a țul.

CMWA-in thuchhuah an siam ang hian, Mizote hi kan awm danah Mizoramah ai mahin ram páwnah kan fimkhur a, nun kan uluk lehzual a țul. Kan inchei dan, kan chezia leh hawiher, kan tawngkam te kan uluk a ngai a, Mizo hnam leh kan Pathian timualpho thei zawnga awm lo tura kan inven fimkhur reng a țul a; Zo nun mawi tak takte a taka lan chhuahtir thin a țul bawk.