Mizote leh lungawi lohna punkhawm

Tun hnaia New Builum khaw mi kuttuara thi thlavâng hauhin New Builum mipuite September 22 khan Kolasib-ah an kal khawm a; kutthlaktute hmél hmuh phûtin District Jail bulah an pung khawm a, police-te'n an lo dan avangin rei vak lo an innawr.

Mipuite hi kutthlaktu jail-a awm mekte hmel hmuhtir an nih hnuah an ṭîn darh a, Kolasib khawpui lûn laiah leh DC pisa tualah an pung khawm leh a ni. Tun hnaiah chuan, Mualṭhuam North-ah an khaw tleirawl tualthihna vangin kawngzawh a ni a, a hmain pawikhawihna vanga punkhawm a awm nual bawk.

Pawikhawihna a thlenin a tuartute thlavâng hauh te, pawikhawihtute hrem ngei phûtna lantir hi India ram chhung leh páwnah pawh an tih fo a ni a; Mizoramah pawh tih ṭhin niin, tun hnaiah phei chuan tih ngei turah kan ngai ta emaw tih turin huaihawt a ni ta deuh zel.

Pawikhawihna thlenga lungawi lohna lantir te, pawikhawihna tuartu thlavâng hauhna lan chhuahtirte hian ṭhatna leh hlâwkna eng eng emaw a neiin a rinawm. Chutihrualin, a ṭhatna leh a hlâwkna tur ngaihtuah lêm chuang lo a, miin an tih vanga ti ve mai, tih ve loh chu mawi lo thei anga ngaih vanga tih ve hrim hrim pawh a awm maithei.

Mi pawhin an ti, tih vang ngawr ngawra ti kan nih chuan a ṭha ber lo thei a; chutianga kan tih zel chuan, Mizo hnam nun (culture)-a bet ang hiala kan ngaih hun pawh a la awm thei - culture hi hmànlai thil ringawt a ni lo a, ngaihtuahna fim tak nen hmalak ṭhin a ngai.

Chuvangin, pawikhawihna thleng leh sualna vanga thil thleng avanga punkhawm huaihawt a nih dawn hian a ṭha zawnga awmzia a neih dan tur leh a hlâwkna turte ngaihtuah a ṭha a; hmalak dan tur leh chêt dan turah ngaihtuahna fim tak hman a ngai. Chutiang bawkin a nghawng ṭha lo awm theite ngaihtuah tel a ṭul bawk.

Punkhawmnaah hian a luruh ring ring, a ṭawng thei theite an langsar duh ṭhin a, chutiang mite duh dan leh an kaihhruaina ang deuha mipui an chêt tak maite pawh a awm ṭhin. Chuvangin, punkhawm reng rengah hian khawtlang hruaitute zai ngaih thiam leh an thu awih thiam a ngai a ni.