Lirthei khalh chunga phone hman

Mizorama lirthei tamna ber leh lirthei che vel tâwtna ber Aizawlah hian lirthei khalh chungah mobile phone hmang hmuh tur an awm ṭhin a; phone-a mi bia te, thu chhu mawlh mawlh te, games khel te hmuh tur an awm fo. Hengte hian khawpuia lirthei tlân tluang an tibuai ṭhin a, chetsual phah a hlauhawm bawk.

Motor Vehicles Act, 1988 [MV (Amendment) Act, 2019] Section 184 chuan lirthei khalh laia mobile phone, tablet leh kuta khawiha hman chi electronic thil dangte a khap a, Central MV Rules, 1989-in a khap bawk. Khap a nih chhan chu - lirthei khalh dana 'hlauhawm' zinga mi a nih vang a ni. Dan bawhchhiate hremna pawh a ná a, pawisa chawi leh jail tan bakah, driving license tihtawp thlenga hrem theih a ni.

Lirthei khalh chunga phone hman khapna dan hi Mizoramah, a bikin Aizawlah hian kenkawh a ni meuh loin a lang. A chhan chu, lirthei khalh chunga phone hmang hmuh tur an tam viau chungin, man an nih thu hriat tur a awm ngai lo a, chanchin tharah pawh puan a ni ngai lo.

Traffic police-te hi niléng deuhthawa khawpui chhunga lirthei tlân buaipuia awm an nih angin, lirthei leh a khalhtute en uluk bertu an ni a, lirthei khalh chunga mobile phone hmang an hmu fo ngei ang. Mahse, dan bawhchhia hmu reng chunga man an tum loh chuan traffic police-te hian pawi an ti lo a, an ngaimawh lo tihna a ni.

Dan kengkawhtute'n dan an ngai pawimawh lo a, dan bawhchhiate hmu reng chunga an enliam mai zel a nih chuan an tih tur an ti lo hle tihna a ni a; kawng tam takah an mawhphurhna an hlen rualin, MV Act 184 bikah chuan an mawhphurhna an hlen lo hle niin a hriat.

MV Act hi mi tin himna tura tih a nih angin, tun hnu zelah chuan traffic police-te hian lirthei khalh chunga mobile phone hman khapna dan hi khauh takin kengkawh se, dan bawhchhiate man zel rawh se.

Lirthei khalhtute pawhin dan kan ngaih pawimawha kan zawm a ṭul. Lirthei khalh chunga phone hman avangin kan chesual kher lo a nih pawhin, lirthei tlan tluang kan tibuai thei a, mi dang kan tibuai ṭhin a ni tih hria ila; phone hman a ṭul ngang a nih pawhin, kawng sira din hmasak nachang i hria ang u.