Thlai/ thei thlan bik neih

Tuipui khuaa Tomato Growers Society chuan Horticulture department nen ṭang dunin tun hnai khan an khuaah Tomato Kût leh Vangpui Day an hmang. Tuipui khuaah hian chhung­kaw 65-in tomato an chíng a; kuminah tomato grade A quintal 1,200 leh grade B quintal 480 an thar a, tomato an hralhna aṭangin kuminah Rs. 57,00,000 an hmu tawh. Kum 2017 aṭang khan tomato aṭanga Tuipui khuain sum an lakluh zawng zawng chu Rs.1,59,38,000 a tling tawh a ni. 

Tuipui hi tun hma­in khaw danglam bik an ni hauh lo a, tuna an danglam bikna erawh chu a lian thama tomato an ching hi a ni. A sik leh sa, ruah tui tlak dan, a san leh hniam thu leh tui awm dante chu thuhran ni ta se, Tuipui khuain sorkar nen ṭangkawpa hetiang tih nachang an hria hi an fakawm a, sorkar lam aṭanga phurpuitute pawh an fakawm khawp mai. 

Mizorama kan lo leh huan neih danah hi chuan a hlawm lian thama thlai leh thei chin bik hi kan nei meuh lo a, a remchang apiang kan ching a ni deuh ber. Chhungkuain kan mamawh leh remchang angte tlang ram loah kan ching a, a lian thama hralh chhuah tur a awm hleithei lo. Tunah rih chuan mahni ei tur chin thar chhuah ngawr ngawr bak hi mi tam zawkin an ngaihtuah mang lo niin a lang. 

Loneitute din­hmun chawi kang a, a hlawm lian thama sum hai lut tur chuan thlai leh thei thlan bik kan neih a ngai. Hetiang tur hian sorkar pawhin a policy hi her rem nachang hria se; khaw khat emaw, a tlang dungin emaw kan dik leh sa leh ruah tui tlak dante zir chungin, kan chenna hmuna ṭha duh tur a hlawm lian thama chin nachang hriat a hun tawh takzet a ni.