HIV vên nan mahni inhriat chian

HIV/AIDS hluar dan tehna (prevalence rate)-ah Mizoram chu 2.85% a ni a, India rama state leh union territory zingah a sang fál hle a, Mizoram dawta sang ber Nagaland (1.30%) aiin a let aia tamin a sang a, India ram pumpui dinhmun 0.19% aiin a let 15-in a sang zawk.

India rama district 800 vel zingah Mizorama district-te chu HIV hluar ber berna district a ni a; Aizawl district phei chu HIV hluar berna district niin, prevalence rate-ah 4.7% a ni. HIV hluar zualna district 25 zingah Mizorama district 10 a lang.

Kum 2025-26 chhungin Mizoramah HIV vei mi 2,645 hmuh chhuah a ni a, ni tin mi pasarih chuang (7.25) hmuh chhuah ang a tling. Hmuh thar mi 2,645 zinga 61.7% chu Aizawl district-a mi an ni.

Mizorama HIV kaite zinga 65% vel lai mipat hmeichhiatna aṭanga kai an ni a, a bul ber chu mipat hmeichhiatna hman khawloh a ni. Nupa kar ni loa mipat hmeichhiatna hman hi Pathian duh loh a ni a, Pathian ringtu, biak-ina inkhawm nei tam ber hnama chhàl ngam hial khawp ni chunga Pathian duh loh em em–sex hman khawloh vanga HIV vei tam berna ram kan ni hi a mualphothlak.

Nun dan leh thil tih ṭhin avanga HIV kai theia ngaih bik an awm a, chutiang mite chu HIV+ve zingah an tam bik ngei a. Mahse, HIV vei àwma ngaih loh, mi nun tluang leh kohhrana rawngbawltute zingah pawh kai an awm nual tawha sawi a ni. HIV hian mi náwlpui a luhchilh tawh tih a chiang a; a la darh zau zel dawn pawh a ni maithei.

HIV darh zel tur venna atana pawimawh em em chu–HIV vei leh vei loh inhriat chian a ni. HIV vei, an nihna hre si lote hi mi hlauhawm berte zinga mi an ni a; HIV vei leh vei loh inhriat chian ngei a ṭul tak zet.

Keimah leh mipui him nan mi tinin HIV-a kan nihna dik tak hre chiang turin thisen kan endiktir vek ngam a ngai. HIV+ve kan nih leh nih loh kan inhriat vek theih nan sorkar hian ruahmanna siamin hma la se, awmzia a nei theiin a rinawm. Heng atan hian HIV/AIDS do hneh turin sorkar, kohhran, pawl leh mipui kan ṭan tlan a, theihtawp kan chhuah a ṭul e.