CEC báng tura phûtna

Election Commission of India-in India ramah electoral roll ennawn rûnpui, Special Intensive Revision a kalpui danah thil dik lo a awm nia hriat vangin Parliament leh state hrang hranga rorel lai BJP eptu political party-te chuan Chief Election Commissioner (CEC) báng turin an phût mek.

Mizorama Congress party pawhin CEC báng tura phûtna lantirin September 25, 2026 khan Aizawlah Vanapa Hall aṭanga Chief Electoral Officer pisa thleng kawng an zawh. Social media lama lâr Cockroach Janta Party pawh inrawlh ve lehin, CEC báng turin an phût a, a báng lo a nih chuan October 2, 2026 aṭangin ram pum huap nawrh huaihawt an tuma sawi a ni.

State hrang hrangah SIR neih a ni tawh a, SIR electoral roll ringa state assembly inthlanpui neihnate pawh a awm tawh a, hmabak state a la awm nual bawk. State ṭhenkhatah chuan SIR tharah hian voter tam tak paih an ni ngei a, Mizoramah pawh voter sing thum chuang paih an ni.

SIR hi ECI bultuma neih a ni ngei mai a, mahse, a taka kalpuitu leh thawktu chu state chhunga sorkar hnathawkte an ni tlangpui. SIR a ni emaw, special summary revision a ni emaw, electoral roll ennawnah hian a bulṭhuta awm, a taka mipui nena indâwr berte chu booth level officer (BLO)-te an ni a; roll aṭanga voter paih leh mi thun thar pawh an kutah thui tak a innghat. BLO chungah AERO, ERO, DEO leh CEO te an awm leh a; anni pawh an pawimawh.

Electoral roll ennawnnaa thawktute hi state sorkara hnathawkte an ni tlangpui. Mizoram dinhmun aṭanga thlir leh roll ennawn dan kalphung thlirin, roll ennawnna aṭanga voter paih leh thun thar tura ECI emaw, CEC emaw inrawlh theihna lai tur hriatthiam a har hle.

Engpawhnise, CEC báng tura nawrna hi a la na tial tial maithei a, Mizoramah pawh pawl ṭhenkhatin thâwm an nei ring tulh tulh maithei.

CEC báng tura nawrna hi a na tial tial a nih pawhin, Mizo mipuite'n ngun taka thil kan ngaihtuah a ṭul. Thâwm lo chhuah ve hrim hrim te, lungawi lohna lo lantir ve kher te hi a ṭul lem lo thei a; Mizoram tana ṭha a ni em, Mizoramah tih ve kher chi a ni em, tihte hi ngaihtuah hmasa ila a ṭha ang.