Hotel/homestay-te mumal taka endik a ṭul

September 24, 2026-a Tourism department leh AMC hotute'n thil pawimawh an sawihonaah, khualzinte thlenna, a bikin homestay ṭhenkhat chu ruihhlo leh mipat hmeichhiat chungchangah dik lo taka hman a nih thu Tourism Minister-in a sawi.

Minister hian Mizoramah khualzin nasa taka an pun thu te, khualzin rawn lut zel se an duh rualin, a ken tel thil ṭha lo lakah lo inven a ṭul thu te, Aizawla homestay ṭhenkhat chu ruihhlo leh mipat hmeichhiat thilah dik lo taka hman an nihna behchhana Mizoram rawn zin an awm ṭhin nia an hriat thute a sawi a ni.

Khualzinte leh a kaihhnawih thil chi hrang hrang sawihonaa Tourism Minister thusawi, a bikin homestay ṭhenkhat chu ruihhlo leh mipat hmeichhiat hman khawloh chungchang hi ngaih thutak a ṭul.

Thil rêng rêngah hian dan leh thupek te, inkaihhruainate a awm ṭhin a, chungte chu bawhchhiat tura siam ni loin, zawm tura siam a ni. Dan leh thupek te, inkaihhruainate hi mipuiin an zawm tur a nih rualin, ṭha taka zawm a nih theih nan kenkawh ṭhat a ṭul.

State pawn aṭangin Mizoramah khualzin an tam sâwt em em a, khualzinte'n an tlawh châk zingah Mizoram a tel tawh a tih theih. Hei vang hian khualzin dawnsawn chungchangah te, khualzinte laka kan ram leh hnam nihna leh dinhmun kan lo hmuhtir chungchangahte mi tin kan pawimawh.

Mizoram mipui hi khualzin, a bikin state pawn lam mi leh hnam dangte laka kan ram leh hnam timawitu leh timualphotu kan ni thei vek a; kan pawimawh vek avangin mahni tâwk ṭheuhah rilru dik pu chunga kan insiamrem a ṭul.

Hnam dang mikhualte'n Mizoram an tehna pawimawh tak pakhat chu thlenna hmun a ni a, hotel leh homestay-te an pawimawh hle. Hotel/homestay enkawltute hian Mizoram hmel tiṭhatu an nih rualin, timualphotu an ni thei tih an hriat chian a, ram leh hnam timawitu ni tura an chêt a ngai.

Hotel leh homestay-te hian ruihhlo tihna hmun leh mipat hmeichhiatna hman khawlohna hmun an nih loh nan hma an la tur a ni a, dan an zawm tur a ni. Hotel/homestay-te hi thuneitute'n a khât tâwka an endik ṭhin a ṭha a, a theih phei chuan thla tin endik thei se a ṭha hle ang.