Lirthei neitute'n dan an zawm a ṭul

Aizawl District Transport Officer (DTO) chuan, sumdawnna lirthei (commercial vehicle) Aizawl district-a tlân zingah document hrang hrang thi (expire) tawh chunga tlân 9,343 a awm mek thu a tarlang a; document nung lo hmangtute chu tinung turin a hriattir.

Sorkara thuneitute'n Aizawl district-a sumdawnna lirthei document thi tawh an tarlante chu mihring phur chi - bus, maxicab, four wheeler leh two wheeler taxi leh autorickshaw te a ni a, bungraw phur chi lirtheite a tel bawk.

Document nung lo chunga tlan mek sumdawnna lirtheite chu December 20, 2026 ral hmaa inchingfel tura hriattir an ni a, hun tiam chhunga document tifel lote chu hrem tur niin, permit tihtawp thlenga hmalak a nih dawn thu tarlan a ni.

Aizawlah lirthei tam tak a awm a, chung zingah chuan sumdawnna atana hman lirthei pawh a tam hle. Lirthei zawng zawngin dan angin document neih ngaite felfai takin an nei tur a ni a, sumdawnna lirtheite'n document dik leh felfai an neih a pawimawh lehzual.

Sumdawnna lirthei zingah Aizawl district-ah ringawt pawh document thi tawh 9,343 lai a awm hi a zialo tak zet. Tun hnai lawk khan Lunglei district-a lirthei document nung lo zat tarlan a ni tawh a, tam tham tam tak a awm. District dangahte pawh document thi tawh chunga tlan ṭhin lirthei tam tak a awmin a rinawm.

Document thi tawh lirthei neitute'n an document-te an tihnun a ṭul a, sumdawnna lirthei neitute'n document nung ngei an hman a pawimawh lehzual. Transport department thuchhuak angin, sumdawnna lirthei zinga document thi tawh neitute'n hun tiam chhung ngeia an document-te an tihnun hi an mawh a ni.

Lirthei document felfai lo zawn chhuah hi thil hautak a nih a rinawm a, a hautak avanga hlamchhiah chi erawh a ni lo. Thuneitute'n tun aia ngawrh zawkin lirthei endik ṭhin se, lirthei document felfai lote chu dan angin hrem zel rawh se. Chutianga tih a nih chuan lirthei document felfai lo pawh a tlem phah ngei ang.

Dan zawm hi khua leh tuite tihmâkmawh a ni a, Pathian thu nena inmil thlap a ni bawk a; lirthei nei zawng zawngin dan an ngaih pawimawh a ṭul.