Ram buai chinfel zel ni rawh se

Chawlhkar liam ta chhung khan Land Revenue and Settlement department chuan Kulikawn huam chhunga Chêkbâwk hmun te, Ramhlun Sports Complex leh Zemabawk West-a Risk Mual an tih mai ṭhina ram buai chinfel eng emaw zat chu a neitute hnenah land pass - Records of Rights (ROR) a hlan.

Minister hian September 28 khan Chekbawkah hian ram (plot) 319 land pass siam thar chu a neitute hnenah a hlan a; September 30 khan Ramhlun Sport Complex Rehabilitation Centre House Suite Plan chhunga ram neite hnenah ROR 127 leh Zemabawk West House Site Plan chhunga ram neite hnenah ROR 96 a hlan bawk.

Thil hre zawkte sawi danin, Chêkbâwk leh Zemabawk West huam chhunga Risk Mual an tihah kum eng emaw zat kal tawh aṭangin ram buai, land pass inthuah a tam hle a, chinfel pawh a harsa hle.

Land pass inthuah tih hian, ram/hmun thuhmun, a neitu pakhat aia tam awm, document pawh nei si tihna a ni ber a; sorkar document nei chunga neitu nia inngai ve vete tan duap zawk nih a harsa hlein a rinawm. Chutiang karah chuan sorkarin ram buaite huaisen taka a chingfel chho ta hi a lawmawm.

Ram leh hmun thuhmun, neitu pakhat aia tam a awm thei hi a mak angreng a; khawi laiah emaw chuan dik lo taka thil ti an awm ngei ang. Mi tute'n emaw Revenue department-a thawkte an bum a ni thei a, Revenue department-a thawkte'n thil dik lo an ti a ni thei a; Revenue department-a thawkte leh mi tute emaw inthuruala thil dik lo tih vang pawh a ni thei.

Chêkbâwk huam chhungah ram la chinfel loh a la awm nuala sawi a ni a, hmun dangahte pawh ram buai, ram inthuah a awm nual mai thei. Ram buaite sorkarin a chinfel zel a ṭul a, chingfel turin khawng leh huaisen taka hma a lak zel a ngai a ni.

Ram leh hmun thuhmun, neitu pakhat aia tam awm, ram inthuah ang chi hi a awm tawh loh nan sorkarin theihtawp chhuahin hma la se; Revenue department-a thawkte'n an hna hi a thlâwna ram neih tumna remchanga hman tum loin, dik takin hna thawk rawh se.