Naupangte leh ruihhlo do

Mizoram Synod, Central YMA leh MHIP bultumin October 2, 2026 khan Mizoram hmun hrang hrangah 'Ram Pum Huap Ruihhlo Do Kawngzawh' huaihawt a ni a; thupui chu 'Ruihhlo tel lo hringnun' tih a ni.

Kawngzawha tel turin naupangte sunday school zirlai an nihna angin khawrh chhuah an ni a; Aizawlah chuan kawngzawha tel zinga a tam ber chu naupang an nih rualin, puitling, a bikin sunday school-a zirtirtute eng emaw zat an tel bawk.

Ruihhlo Do Kawngzawha telte'n ruihhlo ṭhat lohzia tarlannate thuziak an keng a, ruihhlo ti lo tur leh ruihhlo tel loa nun hlimna neih theih a nih thu tein an au rual a; ruihhlo ti lo turin thu an tiam a ni.

Kawngzawhah khan puitling eng emaw zat tel mah se, tel tur inkhawrh chhuah dan leh a taka telte enin, kha kawngzawh khan naupangte a tinzâwn deuh niin a lang. Kawngzawh kha naupangte'n an la tawn ngai loh a ni ngei ang a, an hre rei viauin a rinawm. Ruihhlo ṭhat lohzia leh a hlauhawmzia an hriat chian lehzual phahna, ruihhlo tih duh lohna thinlung an put ngheh phahna ni ngei se a duhawm.

Kawngzawh kha sual leh thil ṭha lo dona ni mah se, kawngzawha tel tura naupangte khawrh chhuah chiam kha ram leh hnam kal zel turah a ṭha zawk ang nge, ṭha zawk lo ang, naupangte rilruah eng nge awm zui ang tihte ngaihtuah theih tak a ni. A ṭhatna a awm ngeiin a rinawm a, a ṭhat lohna lai pawh a awm ve tho maithei.

Danin naupangte a humhalh nasa a, naupang humhalhna dan hrang hrang a awm. Hei vang hian naupangte thil tihtir leh a kaihhnawih thil hrang hrangah fimkhur a ngai em em a; hun lo la kal zel turah fimkhur leh uluk taka ngaihtuah zel ni se.

Sunday school hi ruihhlo ṭhat lohzia inzirtirna atan tun aia ṭangkai zawkin hman ni se. Sunday school-ah hian ruihhlo hlauhawmzia leh a ṭhat lohziate tun aia sawi tam a, nasa zawka inzirtir ni se a ṭha hle ang.