Bru-in min tibuai tawh suh se
Chief minister hoa tun hnaia council of ministers ṭhukhawm chuan, Tripura-a awm mek Mizoram Bru-te Mizorama lak let hna rêng reng chu November 30, 2019 hnuah chuan tihtawp vek tawh turin an rêl.
Mizorama awm ṭhin Bru-te anmahni duh thu ngeiin Tripura-ah an pem a, an pem chhan an sawi dan chu anni lam sawi leh Mizoram lama Mizote sawi dan a inang lo thei ang. Engpawhnise sorkar laipuiin ṭhangkhat lian zet a thlawnin a chawm tawh a, tunah erawh chuan sorkar laipui pawhin a thlawna an chawm hi tihtawp an tum ta.
Bru zingah Mizorama kir duh eng emaw zat an awm a, tunah pawh an lo kir tawh. Chutihlaiin kir duh lo pawh ni satliah lo, Mizorama kir duh ngei ngeite pawh tibuai a, an tana harsatna siam duh an awm hi a vanduaithlak hle.
A hre deuhte sawi dan phei chuan Bru zinga lo kir duhte tan khulaia an hruaitu bawrten harsatna an siam ṭhin a, heng hruaitute hi hun rei tak chhung a thlawna engkim dawng a, sorkar laipui sum hmanga inti milian tawh ang hialin an sawi a; Mizorama an kir chuan an hamṭhatna dawn ṭhinte a bo zo dawn niin a lang.
Bru hruaitute chet dana an puh hi a dik famkim lo deuh a nih pawhin a dik thui hlein a rinawm. Lo kir tura ruahmanna a awm apiangin harsatna an siam ziah a, thil khirhkhan tak tak an phut a, hruai kir tuma ruahmanna awm pawh a tlawlh leh nge nge ṭhin.
Tunah erawh chuan sorkar laipui pawhin thil awm dan a hre chiang tawh niin a lang. NGO-te pawhin kawng hrang hrangin an sawm tawh a, Mizoram sorkar lamin thutlukna an lo siam bawk nen, Bru hruaikir tumna hi tun hi a tawpna ni thei se. Bru chungchangah hian sorkarin thuchhuah a nei nual tawh a, tun hi a tawpna ni ngei tawh rawh se.