EMRS sak leh hna ṭha lo

Mizoram sorkarin hnathawhte a ṭhat leh ṭhat loh endik tura a din Mizoram State Project Monitoring Committee (MSPMC) chuan October 3, 2026 khan Tlungvela Eklavya Model Residential School (EMRS) sak lai an endik a, chanchinbumite'n an ṭawiawm.

MSPMC hian EMRS building sakte chu a ṭha tâwk lo hleah an ngai a, a satu contractor chu insiamṭha turin hrilh mah se, an insiamṭha lem loah an ngai. Sak zawh hun tur a liam hnu kum 4 leh thla 9 a ral hnuah pawh hna 78% vel chiah an la zo a, chutihlaiin, contractor-in a sakna tur sum 94% (cheng vbc 20.9161) a la chhuak tawh tih tarlan a ni.

EMRS hi Ministry of Tribal Affairs-in hmun kilkhawr zawka schedule tribe naupangte'n a thlâwna zirna ṭha an dawn theihna tura a ruahman a ni. A pawimawh em em a, Mizoram, a bikin thingtlang naupangte tan chhawrnahawm tak tur a ni.

Ram leh mipui tana ṭangkai tak tur Tlungvel EMRS an sa muang lutuk leh, in an sakte a ṭha tâwk lo nia hriat a ni a pawi hle. A satute'n mipui an zahlo hleah a ngaih theih a, naupang himna an dahkhamah pawh a ngaih theih hial àwm e.

Tlungvel EMRS satu contractor hian tun aṭang chuan ngawrh lehzualin hna thawk se, chak takin, ṭha tak siin hna thawk rawh se - chu chu an mawhphurhna a ni. MSPMC emaw, sorkar thuneitu dangte pawhin uluk lehzualin vil se, zing zawkin endik rawh se.

Sorkar project hrang hrangah contractor an awm ṭhin a, hna vila enpuitu engineer an awm ṭhin bawk. Tlungvel EMRS sak dan hi a ṭha lo a nih chuan, a viltu leh enkawltu engineer mawh a ni tel. In sak leh hnathawh a ṭha lo a nih chuan a enkawltu engineer-te'n an hnâwl ngam tur a ni.

Hetihlai hian, contractor-in harsatna lian tak a tâwk a ni ve thei a, hna thawh chak theih loh chhan lian tak a awm a ni thei. Sorkara thuneitu lam aṭangin hlâwkna lo têl ve tum tlat an awm a, chu chuan hna a tichhia pawh a ni thei; chutiang chu a awm leh awm loh chîk zawka en ni se a ṭha hle ang.