Zángnadawmna phût vanga buaina dang

Aizawl Western By-Pass Road-in a paltlang tura ram neitute, Sihhmui to Muallungthu Land Ownees Welfare Association chuan, Aizawl West By-Pass Road siamnaa ram làkah zángnadawmna la pek lohte hnenah October 2026 chhung ngeia pek an phût a, pek an nih loh chuan November 1, 2026 aṭangin hnathawk turte dan an tum thu October 6, 2026 khan press mite hmaah an puang.

Ram neitute hian zangnadawmna la pek loh zat chu mi 100 chuang an ni a, sum pek tur zat nuai 740 nia an hriat laiin, PWD erawh chuan la pek loh chu mi 17 an ni a, pek tur zat chu cheng nuai 98.3 a nih thu an tarlang tih an sawi.

Zangnadawmna dawn aia LSC neih thlangtute chu ram tehsak thuai an phût thu te, kawng laihna leivungte chu dumping ground-ah chauh paih an phût thu te, kawng laih vanga leimin leh leivungin a tihchhiat huan thlai neitute hnenah zangnadawmna pek an phût thute an sawi bawk.

Mizoramah kawngpui laih leh hmasawnna hnathawh dang a awm reng rengin zangnadawmna hi a langsar ber pawl a ni ṭhin a, zangnadawmna pek chungchanga lungawi lo thâwm hriat tur a awm fo. Zangnadawmna a langsar viau ṭhin leh, lungawi lo tâwk an awm ṭhin hian ngaihtuah a tithui. Sorkara thuneitute lamin thil dik tâwk lo an tih ṭhin vang nge, ram neitu nia insawite an duhâm lutuk vang ni ang, tih hi ngaihtuah theih tak a ni.

Sihhmui leh Muallungthu inkara kawngpui thar, Aizawl Western By-pass Road siam mek chungchang bikah, sorkar (PWD) leh ram neitu nia inchhálte'n zangnadawmna pek tur la pek loh zat an hriat dan nasa taka a inang lo hi a mak hle. Hre dik lo zawk emaw, thil dik lo tih tum emaw an awm a ni thei a; thuneitute'n an endik thuai se, thil nihna dik tak puangzar se a ṭhat a rinawm.

Sorkar lama thuneitute'n tih dik loh emaw, hmaih emaw an nei a nih chuan, a dik lo lai zawng chhuakin ti ṭha se; ram neitu nia inchhâlte'n sorkar hriatpui hauh loha ram nei anga an inchhál ve ngawt emaw, duhâm vanga dik lo taka zangnadawmna lak an tum a nih chuan, inlamlêtin, hmalak an tum dan sût se a ṭha hle ang. Sihhmui leh Muallungthu inkara kawng thar siam meka zangnadawmna beisei vanga harsatna thleng mai thei hi sorkarin a vèn a, a chinfel thuai a ṭul.