Him nan in saknaah lèn zâr a ṭul

Aizawl Municipal Corporation chuan tun hnaiah hriattirna an chhuah a; AMC huam chhunga in sa rêng rêngte'n in sak laiah lên (safety net) zàr vek tur a nih thu an tarlang. Hei hi mipui himna tur thlira tih a ni. Kawng kam leh kea kalna (footpath)-ah in sakna bungrua dah hnawk loh tur, an ti bawk.

Aizawlah hian kawng kama in sa, in satute'n in chhâwng chung lam aṭanga thil an tihtlakin kawngpuia kal mek a tlâk a, thih phah pawh an lo awm tawh ṭhin; chuvangin, mipui himna tura AMC hriattirna tihchhuah hi a pawimawh hle.

Mizorama kan khawpui hrang hrangah hian hun rei tak chhung chu kawng kam maia in sate'n kawngpuia kalte leh a chhehvela awmte himna atan lên zar nachâng kan hre lo rei hle. Tunah chuan kan harh ve tial tial a, kawngpui kama in sa tam tak chuan lèn an zar ṭhin tawh a, lèn zàr nachang la hre lo tam tak an la awm bawk.

AMC-in Aizawla in sakna bula che velte himna tura in saknaah lên zâr vek tura a tih hi in sa rêng rêngte'n an zawm ngei a ṭul. AMC-in thuchhuak awm lo pawh ni se, mipui himna tur ngaihtuahin, chhia leh ṭha hriatna hmang pawha tih àwm tak a ni. Tunah chuan Aizawla thuneitu AMC-in hriattirna an chhuah tawh lehnghal a, in satute tihmâkmawh a ni ta.

Kawng kam leh mipui chêt velna hnaiha in sa zingah lèn zár lo an awm a nih chuan, zár turin mipui leh khawtlang hruaitute'n hrilh hreh lo ila; a ṭul ang zelin thuneitute hnenah pawh thlen hreh loh a ṭha. AMC pawhin an vil uluk a ngai a, dan leh thupek zâwm lote chu hrem hreh loh a ṭul bawk.

Kawng kam leh kea kalnaa in sakna bungrua dah hnawk loh tur, tih pawh mi tinin kan zawm a ṭul. Laklawh thila dah zawk a ṭul hun erawh a awm thei a, chu chu inhriatthiampui a ngai ve a; chutiang a nih pawhin, ni/zan khat aia tam erawh awm lo se. Hemi chungchang hi khawtlang hruaitute'n an ngaihsak a, hma an lak ṭhin a ngai a ni.