Dan loa pension laka sorkar hmalakna

Dan loa state sorkar aṭanga family pension late'n an duhthua Pension Payment Order an pek lêt theih hun Mizoram sorkarin a hawn chu September 30, 2026 khan a tawp a; hun hawn chhungin sorkara PPO pe let mi 674 an awm.

Hun tiam chhunga sorkara PPO pe lette chu ngaihdam an ni dawn a; pe let lo, hmuh chhuah leh si an awm chuan dan anga hrem tum a ni. Mi 674-te'n PPO an pek lêt avanga Mizoram sorkarin sum a hum tur zat chu thla khatah nuai 1,25.65 a ni a, kum khatah chuan vbc 15.07 a tling.

Mizoramah dan loa family pension la an awm thu hi sawi a ni tawh ṭhin a, awm zat erawh hriat theih a ni lo. Mi ṭhenkhat chuan pension an lak theih nan nupa inṭhen hauh si lo, inṭhen anga inlantir a, lehkha pawimawh (document) siam chawp an awma sawi a ni ṭhin a; document dangte pawh siam an awma sawi ṭhin a ni bawk.

Tunah chuan sorkar hmalakna azarah dan loa family pension la mi 674 an awm tih a chiang ta phawt a; dik lo taka thil tih avangin kum tin sorkar sum vbc 15 vel a kal ral ṭhin ang a ni a; a zialo tak zet.

Kristian, Pathian ringtute ni site zingah heti zat dan lo leh dik lo taka hre reng chunga thil ti duh an awm hi a zahthlak. Dan loa pension lak theihna tura mi ṭhenkhat thil tih duh dan ngaihtuahin, a rapthlak ti pawhin a sawi theih.

Dan loa pension lak tihtawp a nih theihna tura hmalak a ni hi a huaisenthlak a, sorkara thuneitute leh a buaipuitute an fakawm. Tunah hian dan loa pension la ru pawh an la awm maithei a, chungte chu zawn chhuah an nih theih nan sorkar hian huaisen takin hma la chhunzawm zel se. Zahngaihna hun hawn laia pe lêt duh lo a, dan loa pension la an la awm a, man an nih chuan dan ang takin hrem ngei ni rawh se.

Dan loa family pension la hriate chu Accounts & Treasuries-ah hriattir turin mipui ngen an ni; ngenna ang hian a hriate chuan thuneitute hnenah hriattir zel ni se, inhêknaah ngai lo ila a ṭha ang.