RTI Act Section 4 tihhlawhtlin a ṭul

Kumin October 5 aṭang khan Right to Information (RTI) Week hman a ni a, kawng hrang hrangin hman a ni. RTI Act leh a kaihhnawih thil chi hrang hrangte inzirtirna hun hi vawiinah a tàwp ang.

Week pual hian Aizawl leh district hrang hrangah RTI Act chungchang inzirtirna hun hman a ni a; mipuiin RTI Act an hriat chian lehzual theih nan leh an hman ṭangkai zawk theihna tura thawktute'n ṭhahnemngai taka mipui an hrilhfiah ṭhin hi a lawmawm.

October 8, 2026-a Assembly Annexe-a RTI Week an hmannaah Larsap chuan, sorkar rorelnaah thup nei loa langtlang taka thil tih chu kalphung ngheta neih tur a nih thu a sawi. ATI Director pawhin October 9-a MJA-te nen hun an hmannaah, RTI Act chu sorkar hnathawkte'n harsatnaah an ngai tur a ni lo tih a sawi.

Larsapin a sawi ang hian, sorkar leh a department hrang hrangte hian langtlang taka thil an tih ṭhin a ṭul. RTI Act Section 4-ah, suo motu disclosure a awm a; RTI Act hmanga dil kher ngai loa sorkar department-te'n mipui hmuh leh hriat theih tura website emaw, thil dang hmang emaw an puangzar tur thil tam tak a awm.

Section 4 hi sorkar department-te hian a nih dan tur takin tihlawhtling se chuan, RTI Act hmanga miin thil an dil ṭhin tam tak chu dil a ngai loin a rinawm. Chuvangin, RTI Section 4 hi sorkar department-te leh official-te'n ṭha taka an tihhlawhtlin a ṭul. Chutihrualin, suo motu disclosure-ah a ni emaw, RTI Act hmanga thil dilnaah a ni emaw, thup ngai chin erawh a awm tih mipuiin kan hriat a ṭul bawk.

ATI Director-in, RTI hi sorkar hnathawkte'n harsatnaah an ngai tur a ni lo tih a sawi hi a pawimawh hle. Department leh pisaa RTI Act buaipuituteah RTI hian hna a titam ngeiin a rinawm a; mahse, an hnain a ken tel, an mawhphurhna a ni tih hria a, ning mai loa theihtawp an chhuah a ngai.

Sorkar hnathawk, MLA leh minister zingah RTI Act hnawk ti riau a awm a nih chuan an dik tâwk lo tihna a ni thei. RTI Act hi mi dik tan a hlauhawm lo a, RTI hlau leh hnawk ti tlat an awm a nih chuan an inenfiah a ṭul. RTI Act hnawk ti lo a, lâwmtu zawk ni ṭheuh turin sorkar hotute leh thawktute an awm a ngai e.