Khauh zawka lui humhalh a ṭul
Mizoram luiah sangha an tui hun lai a ni a, inthlah pung tura hun pawimawh lai a ni. Sangha fuante mipuiin an man loh nan Mizoram sorkarin October 10 aṭanga November 30, 2026 thleng sangha man khapna thupek a chhuah.
Sangha man khapna thupek bawhzuiin YMA, Lengpui Branch leh Lengpui Model Branch te chuan October 10, 2026 aṭang khan an khaw ram chhunga Dialdâwk lui leh Lunghmul luiah sangha man a nih loh nan leh, miin sangha fuante an ruh loh nan an véng ṭan a; thla khat leh a chanve chuang chhun leh zan zawmin an veng dawn a ni.
Aizawl district-a YMA branch 27 dangte pawhin an huam chhunga luite humhalhin an veng ṭhin tih sorkar thuchhuah chuan a tarlang bawk.
Bible kan en chuan nungcha, ei chite hi Pathianin mihringte'n an ei a phal a, ei thiang leh ei thiang lote pawh a thliar. Hei vang hian Pathianin mihringte'n an mamawh ang tâwka an ei tura a siam leh a dahah ngaih theih a ni àwm e. Mihringte'n an nawm an mâka an tihbuai a, an mana an tihhlum tur erawh a ni lo.
Tun hma aṭangin Mizote'n luiah nghafuan an lo véng tawh ṭhin a, heta véng tih hi man tumin an châng tihna a ni. Thingtlang hmun tam takah ram leh luia nungchate hi sa an ei theih remchâng a ni a, nungchate an ei ṭhin kha a àwm em em. Nungcha humhalhna dan a awm tih pawh an hre kher lo ang.
Mahse, tunah chuan nungchate humhalh nachang kan hriat loh rah a lang mek. Ramsa, savate leh luia nungchate Mizoramah a tlem tawh em em a, ṭhenkhat chu an rêm a ni ber tawh a, rêm mai hlauhthawnawm tam tak a awm bawk. Chuvangin, nungchate humhalh a ṭul tak zet tawh.
Sangha fuan hun laia sorkarin sangha man khapna thupek a chhuah hi a ṭha a, Mizoram mipuite'n ṭha taka thupek kan zawm a ṭul. Sorkar thupek bawhzuia Lengpui khawtlang leh khaw dang eng emaw zatin an huam chhunga luite humhalha an veng hi a ṭha tak zet a, an inpekna a ropui.
Mizorama khaw hrang hrangte'n mahni huam chhung ṭheuha luite humhalh vek ila, a ṭul angin vengtu dah thei ila a ṭha hle ang. Mipui pawhin sangha inthlah pun hun lai hi chuan sangha man i tum lui lo ang u.