Ruihhlo ngaite khâwma thu ṭha hrilh
Central YMA leh Central KṬP chuan October 8, 2026 zan khan Police leh Excise & Narcotics puihnain Aizawl khawlaia ruihhlo ngai vâk rawlai mi 136 lai CYMA Hall-ah an hruai khawm a, counselling neihpuiin, Pathian thu leh nun dan ṭhate an hrilh.
Aizawlah hian khawlai leh kàwm kára zana riak mai ṭhin ruihhlo ngai eng emaw zat an awm a, an hnawksak bakah, khawpui khawlai tirálmuang lotu an ni. Hmeichhia leh naupang tan khawlai a rálmuang lo zual ṭhin. Hei vang hian YMA branch ṭhenkhat chuan an huam chhungah ruihhlo ngaite an awm khawm loh nan an veng ṭhin a ni.
Ruihhlo ngaite chhanchhuahna lama hma latu leh thawktu ṭhenkhat chuan ruihhlo ngaite hi 'damlo an ni' tiin an sawi ṭhin. An thlirna aṭang chuan a dik ang, hei hi mipuiin kan hriatthiampui a ṭha. Chutihrualin, mi tam tak tan chuan 'damlo' ni loin, 'misual' tia sawi theih an ni a, he thlirna pawh hi hriattthiampui a ṭul. Zâwldawh taka tih an ṭul hun a awm rualin, vîn deuh taka enkawl an ngaih hun pawh a awm.
Aizawla ruihhlo ngai, mahni ina haw nacháng hre lo leh hawna tur nei mumal lote'n an nun dan ṭha lo an bànsan theihna tura Police, Excise & Narcotics, Central KṬP leh Central YMA bakah, CYMA hnuaia Central Anti Drug Squad leh Zone Anti Drugs Squad te an thawkho hi a ṭha a; an hmalakna hian rah ṭha chhuah ngei se a duhawm.
Ruihhlo ngai zinga tam tak chu thu ṭha dawng ngai lo, Pathian thu hrilhtu pawh nei lo an nih a rinawm. Chuvang chuan sorkar lam mi te, YMA leh kohhran ṭhalaite hian ruihhlo ngaite chhan chhuahna turin hma la chhunzawm zel se; zing zawkin Aizawla ruihhlo ngai tei rawlaite hi khawmin Pathian thu nen hun hmanpui zel theih ni se a duhawm. Theihtawp chhuaha ṭan an lak phawt chuan chhan chhuah tâwk an la nei ngei ang.
October 8, 2026 zana ruihhlo ngai khawm zingah HIV vei hmuh chhuah an awm nuala sawi a ni a; hei hian ruihhlo ngaite zingah HIV vei an awm leh awm loh enfiah a ṭulzia a tilang. Aizawl khawlaia ruihhlo ngai tei rawlaite zingah hian a tam thei ang ber HIV test tih a nih theih nan hmalak zui zel ni rawh se.