Dan ngaih pawimawh chin puanzar

Kumin 2026-ah traffic police-te Aizawlah Pathianni-ah leh zanah zankhua deuhthawin ṭum eng emaw zat Special Drive an nei tawh a; khawlai hmun hrang hrangah lirthei tlan vel an endik ṭhin a, dan zâwm lo mi tam tham tak an man tawh.

Mipuiin lirthei kaihhnawih dante ṭha taka an zawm theihna tura traffic police-te'n ṭhahnemngai taka khawpui chhunga lirthei tlân vel an endik ṭhin hi a ṭha tak zet. Beisei ang leh duhthusamin mipuite'n dan la zâwm ṭha vek lo mah se, rah ṭha a la chhuah ngei ang.

Traffic police-te'n Special Drive an neih apiangin dan bawhchhia man tur mi eng emaw zat an la awm zel a, a hnuhnung ber October 10, 2026 zanah pawh mi eng emaw zat an man. Drive neih apianga man tur tam tham tak an la awm zel hian mipui zingah dan ngai pawimawh lo leh zawm tum lem lo tam tak an la awm reng tih a lantir.

Lirthei dante leh traffic rules-te hi traffic police an awm loh avangin bawhchhiat a thiang ta tihna a ni lo; police an awm loh lai hi ṭha taka zawm a ṭul hun lai tak zawk a ni. Lirthei kaihhnawih dante mipuiin kan zawm mai kan tih tur a ni a, kan him tlànna tur tur a ni tih kan hriat thar a ṭul.

Traffic police-te'n special drive an neiha mi an man chhan zingah mipui nâwlpuiin dan bawhchhiatna a ni tih an hriat chian loh a awm theiin a lang. Entir nan, bullbar/crash guard vuah chawp hi danin a phal lo a; chutihlaiin, a awm dan leh lirthei azirin police-te'n man ṭul tih chin an nei niin a hriat. Danin a phal loh zingah traffic police-te'n pawm chin leh pawm loh chin te, ngaimawh leh ngaimawh lem loh te, man duh chin leh man ṭul an tih loh chinte a awm niin a lang.

Lirthei khalhtu'n lirthei kaihhnawih dante an hre tura ngaih a nih laiin, danah thil chi hrang hrang a tam avangin hriat vek a harsa fo. Chuvangin, traffic police-te hian dan an ngaih pawimawh bik te, mipuiin zâwm ngei se an tih lai bikte chu mipui hriatah an puanzar tam a ṭul. Lirthei dan chungchang leh dan zâwm tura mipui zirtir kawngah tun aia an ṭan lehzual a ngai a ni.