Hnam dang hnena thawhlawm khawn

Mizoramah hnam dang dan loa sumdawng leh Mizo hming hawha sumdawng an tam nia sawi a ni fo; a dikna chin a awm ang.

Kan rama hnam dang dan loa sumdawng te, Mizo hming hawha sumdawntir ang chi hi mi tam takin an vei a, ṭha lo an ti a; ngaimawhtu zingah zirlai pawlte leh sumdawng pâwlte an langsar zual. Sumdawnna thil mai bakah, sumdawng ni lem lo, hnam dang (vai) hrim hrim ngaihtheih lohna hi pawl leh mimal ṭhenkhatah a lian niin a lang.

Mizorama dan loa hnam dang sumdawngte kan vei tur a ni a, tihtawp a nih theih nan ngaihtuah kan sên bakah, a taka hmalak a ṭul. Kan rama dan loa hnam dang sumdawng te, Mizo hming hawha sumdawngte kan vei viau nia a lan lai hian, kan vei dan leh hma kan lak danah inenfiahna tur kan nei ve tho àwm e.

Tun hma aṭangin Mizorama zirlai pawl ṭhenkhatin hnam dang hnen aṭangin pawisa an khawn a, tukluih thawhlawm an la ṭhina sawi a ni ṭhin. Tun hnaia AMPEDA-in an member-te hnen aṭangin MZP-in pawisa an lak avanga an lungawi loh thu an puang a; MZP pawhin an lak ngei thu leh, an inkhawmpui atana thawhlawm a nih thu an sawi.

Zirlai pawlte'n hnam dang sumdawng, contractor, supplier te aṭanga tukluih thawhlawm an khawn ṭhina sawi hi mi tam takin zirlai an hmuhmawhna lai a ni. Chutihrualin, ṭha titu an awm ve nual tho a; ṭha an tih chhan chu - vai pâwngpawrh lutuk tur vênna leh vai danna chi khata an ngaih vang niin a lang.

Vai hnen aṭanga thawhlawm khawna lak hi vai danna a ni rêng em tih hi ngaihtuah tham tak a ni a; vai danna ni loin, sumdawn phalsakna zawk a ni thei. Zirlai pawlte hi sumdawn leh hna thawh phalna petu an ni lo mah se, vai hnen aṭanga thawhlawm an lak hian an theihna chinah sum an laknate chu sumdawn phalna an pe tihna tluk a ni thei. Ngaihngam taka vai sumdawntirna a ni thei bawk.

Dan loa Mizorama vai sumdawng kan duh lo tak tak a nih chuan, an hnen aṭangin tukluih thawhlawm phût loh leh lak loh ngam a dik zawkin a rinawm. Sum min petute lakah hian kan huai ngam loh tlangpui avangin, vai lakah sum phût lo ngam ila, an lakah kan huaisen ngam zawk ang.