RTI Act huam chin

Mizoram Pradesh Cong­ress Committee (MPCC) Commu­nication department chuan tun hnai khan thuchhuah siamin, RTI Act hmanga minister-te'n lehkha an pek chhuah chu dan kalh leh hrem theih anga chief minister-in tun hnaia a sawi chu RTI Act palzût tumnaa an ngaih thu an tarlang a; "Minister-te official correspondence zawng zawng pawh zawh chhuah theih a ni tih lo hre thar se kan duh," an ti. 

RTI Act hi India rama tluang leh ṭha taka sorkar a kal theihna tura khalh ngilna hmanraw pawimawh tak a ni a, eirukna, hlemhletna leh thil dik lo dona atan ṭangkai taka hman ṭhin a ni. Mizoramah pawh RTI Act hi kan hmang 

ṭangkai ṭan viau a, chutih rualin state dangte khaikhin erawh chuan he hmanraw ṭha leh chak tak mai hi kan la hmang ṭangkai tawk lo niin a lang. 

RTI Act hmang hian sorkar official document zawng zawng deuhthaw hi dil chhuah theih a ni a, a huam loh tlem te a awm chauh zawk a ni. Hei vang hian miin RTI Act hmanga zawhna an zawh hi sorkar office-te hian a kimchang leh chipchiar thei ang berin an chhang tur a ni a, chu chu danin a phut angin an tih ngei ngei a ṭul zawk a ni. 

Tun hnaiah kan ram hruaitute lehkha ziak chu RTI Act hmanga zawhna chhannaah hai lanin a awm a, an thu­ziakte chhiarin a vanduaithlak takzet a ni. Mimal an duh­sak bikna thu an ziakte chiang takin a lang a, thiamna leh theihna nei sang bik lote pawh an duhsak zawng an nih avanga sorkar hnaa la tura tihna thute an ziak a ni. 

RTI Act hmaah chuan lang lo tura thuhruk hi a awm ta meuh lo. Miin sorkar chet vel dan a hre duh a nih chuan RTI Act hmang hian zawh chhuah theih a ni a, RTI Act chungchang hi kan hriat chian poh leh kan hmang ṭangkai zual zel dawn niin a lang.