Myanmar-a bungraw thawn luh hi
Lawngtlai AOC Veng Branch YLA-in October 13, 2026 khawvar hmain Zothan Auto Works aṭanga kal pick-up lirthei Tata Yodha thar hlak 10 lai mai an man. October 15-a Lawngtlai DC hoa sorkar hotute leh CYLA hruaitute ṭhukhawm chuan lirthei mante chu dealer-te'n intiamkamna an nei a nih chuan Aizawla thawn lêt an rêl.
Lirthei tê lo tak mai 10 lai YLA branch pakhatin an lo man hi Mizorama thil manah chuan a pui tham hle. A nghawng pawh a lian a, a mantu Lawngtlai AOC Veng YLA hruaitute chu Central YLA-in October 14-ah an ṭhiat nghal.
AOC Veng YLA chu an chunga CYLA thil tih danah an lungawi lo hle a; lirthei an mante chu CYLA Kumpuan Chairman-in a hma chawlhkar liam taa an intihfel tawh a nih avangin chhuahtir turin a ti niin an tarlang.
Dan loa Myanmar rama thawn luh tur nia hriat lirthei 10 chungchanga CYLA hruaituin 'intihfel tawh' a ti hian ngaihtuah a tithui; dan loa Myanmar-a bungrua thawn luh chungchangah CYLA hi a inrawlh thûk hle em ni, tih ngaihtuah theih tak a ni.
Pick-up 10 lai man a nih hma pawh hian Mizoram chhim lam kaltlangin Myanmar-ah lirthei thawn luh a lo ni fo tawh mai thei a; tuialhthei phei chu Mizoram aṭangin an thawn lut nasaa sawi a ni ṭhin.
Assam Rifles hi Mizoram/India leh Myanmar ramri vengtu an ni a, ramri kaltlanga dan loa bungraw rawn lutte an man ṭhin. AR-te'n Myanmar aṭanga bungraw rawn lut an man laiin, Mizoram aṭanga thawn luh tur an man thu hriat a ni meuh lo hi a mak viau.
Sorkar laipuiin Mizoram chhim lam deptu Myanmar rama chêngte a tlawn a, tihlawm a duha sawi a awm ṭhin; dan loa Mizoram chhim lam kaltlanga sumdawnna pawh nasa takin a kal a, AR ho pawhin an kaltlangtir zel mai ṭhina sawi a awm.
Mizoram chhim lam ramria dan loa sumdawnna hi sorkar laipuiin ṭha a ti a nih pawhin, Mizoram bik tan ṭha em, tih erawh ngaihtuah tham a ni. Nasa takin Mizoram a nghawng thei a, tunah pawh a nghawng chhuah YLA-ah kan hmu mek. Central-in ramri vengtu atana a dahte'n an enliam mai zel a nih pawhin, Mizoram leh hnam leh khawtlang inrêlbâwlna leh inlungrualna tichhetu a nih loh nan thiam taka hmalak a ṭul ngei ang.