Kohhran ṭhalaite che chhuak zel se
Kristian Ṭhalai Pawl member-te chuan Central KṬP huaihawtin October 17, 2026 khan Mizoram pumah faina beihpui thlâkin, faina hnatlangpui an nei a, khawlaia bawhhlawhte an thian fai. He hmalakna hi KṬP General Conference 2026-in ram pum huapa faina beihpui thlak a rêl bawhzuina a ni.
Kan ram leh hnam leh khawtlang hmasawnna leh changkanna turin kohhran ṭhalaite'n hma an la tawh ṭhin. PYD (NEI) chuan Social Work Day neiin, kum tin vantlang tan thil ṭha an ti ṭhin a, khawlai tihfai hnatlang pawh an nei fo tawh. PYD (Mizoram) chuan General PYD hnuaiah Social Wing neiin, ram pum huapin faina an nei tawh ṭhin.
Mizoram Baptist Kohhran chuan an thuthlungah leilung leh a chhunga chengte humhalh leh, faina leh thianghlimna chungchang an telh a; chumi ang chuan ṬKP-te'n hman an la ṭhin. Kohhran pawl dang ṭhalaite pawhin hma an la tawh ṭhinin a rinawm.
Hetihlai hian, Mizorama kohhran ṭhalai pawl lian ber KṬP hian ram pum huap angin faina lamah hmalakna an la nei tam lo niin a hriat a; tun hnai lawkah ram pum huapa faina hnatlang an huaihawt ta a lawmawm tak zet. An hmalakna hian kan khawtlang, kan khawpui leh kan ram a fai zual zelna turah awmzia a nei ngei ang.
YMA leh a anpui tlawmngai pawl dangte'n tun hma aṭangin faina lamah nasa takin hma an la tawh ṭhin a, mahni huam chhungah vawi tam tak faina hnatlang an neih tawh bakah, inzirtirna lam pawh an kalpui ṭhin.
Tunlaiah phei chuan Aizawla YMA branch-te fainaah an inel mek a, nasa takin hma an la a, Aizawl bikah chuan hmuh theihin fainaah hma kan sâwn a ni. Heng hmalakna zawng zawng hian rah ṭha tak a chhuah chiang a, chutihrualin, kan fai danin duhthu a la sâm lo cheu.
Kohhran ṭhalai pawlte hi inhlâwm khâwm ṭha tak an ni hlawm a, an bawh lamah chuan an hmalaknain awmzia a nei hle ṭhin. Thlarau lam thilah theihtawp chhuah zel chungin KṬP leh kohhran ṭhalai pawlte hian khawtlang faina leh thianghlimna lamah tun aia nasa zawkin hma la thei se; khawtlang tana thil ṭha tih kawngah ṭan la lehzual se, ram leh hnamin hma a sâwn chak lehzual ngei ang.