Tourism-in a ken tel ṭha lo laka invên

Tourism Minister chuan October 13, 2026 khan Aijal Club-a press conference a neihah, Mizoramah khualzin nasa takin an pung chho a, chumi karah chuan tourism-in thil ṭha lo a ken tel theih laka invên sorkarin an ngaih pawimawh thu a sawi.

Minister hian, "Tourism-in a ken tel theihte hi Mizoramah a rawn thleng ve ngei dawn em kan hre lo. A lo thlen thulh atan kan inbuatsaih. Tourism ṭhang mekah hmeichhia leh naupangte himna tur lam pawh ngaihtuah a ni tawh a, theihtawp chhuahin kan inbuatsaih zel ang," a ti.

Tourism Minister sawi danin, kumin 2026-ah January-August chhungin state pawn aṭangin Mizoramah khualzin mi nuai 6.7 an rawn lut tawh a, kum hmasa aiin 51%-in an tam tawh zawk.

Mizoram tlawhpawh a awlsam tâk sawt avang leh social media chak tak avangin hnam dangte'n Mizoram an hre tial tial a, tlawh châk an tam sâwt a, tlawhtu pawh nasa takin an pung. Hengte hi thil lawmawm lam a ni a, hnam dang khualzinte hi hawihhâwm tak leh mawi takin, ṭha takin kan lo dawngsawng zel tur a ni.

State páwn leh ram páwn aṭanga khualzin rawn lutte hi mi ṭha leh fel tak vek an ni lo ang tih a chiang a, thil sual tih tum paha rawn lut pawh an awm nual ang; thil ṭha lo chi hrang hrang, kan ngaihtuah phâk loh thlengin a rawn lut telin a rinawm.

Minister-in a sawi angin, state páwn aṭanga khualzinte'n thil ṭha lo an rawn ken tel theihte ngaihthah loin, véng turin sorkar hi nasa takin inbuatsaih se; páwl leh kohhrante bakah, mipui pawhin kan theihna apiangah kan vêna kan lo inrin lâwk a ṭul. Tun aṭanga kan invên a, kan inrin lâwk loh chuan zâwi zâwia kan hnam nun tichhetu a la ni thei ang.

Khualzin rawn lutte hi lo do tur a ni lo a, hawihhâwm takin kan lo lawm ang a, an lakah Zo nun ze mawi kan lo lantir zel tur a ni. Chutihrualin, thil ṭha lo an rawn ken luh te, mawi lo taka chete leh thil sual tite chu kan dîm tur a ni lo.