Ramvah leh sa pêl sim tawh ila

October 19, 2026 khan Kawlkulh khuaah thil lungchhiatthlak tak mai a thleng a, Kawlkulh pa pakhat chuan a ramvahnaah an khaw mi tho mi pakhat chu silaiin a kâp hlum a; ramsa nia a hriat vang nia sawi a ni.

Mi kâp hlumtu leh a kah hluma te hi chhungkuaa inhnaivai tak an ni a, an inngaidama niin an sawi. Chutihrualin, a kâp hlumtu hi police-in thu zawhfiah atan an man a ni.

Mizoramah ramvahnaa ramsa emaw intih vanga inkah hlumna a thleng tawh ṭhin a, a pawi hle. Hun eng emaw chen thâwm a awm tawh loh hnuah tun hnaia a thleng leh hi a pawi tak zet; thleng tawh lo se a duhawm.

Mi tihhlum leh tihnat hi tum rêng vang ni lo pawh ni se, danah chuan pawi khawihna a ni tho. Thihna thlengah phei chuan BNS Section 105 hnuaia thubuai neih theihna a ni a, kum 10 thleng tàn bakah, pawisa chawi theihna a ni. Kawlkulh rama thil thleng pawh hi BNS 105 hnuaia thubuai lut thei chi nia sawi ni a, ramsa humhalhna dan hmanga thubuai neih theihna a ni bawkin a rinawm.

Kawlkulha inkah hlum palhna thlengah hian chhungkua inngaidam mah se, dan anga police-in hma an la hi a ṭha. Pawikhawihna thlenga inngaihdamna leh thil zûzî ṭhin hian sual leh pawikhawihna a tingampa thei a, danin a kawng a zawh mai hi a ṭha a ni.

Wildlife Protection Act, 1972-in ramsate a humhalh vek a, humhalh nat zual bik pawh eng emaw zat a awm. Ramsate hi kah leh tihlum hi dan anga inhrem theihna a nih avangin Mizote hian sa pêl leh nungcha tihlim kan chìn hi kan sim a hun tawh.

Khawvel a changkang zel a, dan kan hriat belh zel a; ramsa humhalhna lamah pawh Mizote kan duh khirh tial tial. Chuvangin, kan beisei hauh lohin thubuai neih theihna a nih avangin ramsate hi pêl lo ila, kâp lo ila, tina lo ila a ṭha ber.

Hetihlai hian, ramsate hi danin humhalh viau mah se, huan/lo thlaite tana hnawksak leh eizawnna tichhe thei khawp leh, mihring nunna atana hlauhawm theia ramsa an awm a nih chuan, miin an pêla an lo tihlum a nih pawhin hriatthiam chin kan neih thiam erawh a ṭul ve bawk.