Sumdawnna atana Bible hman

Bible Society of India, Aizawl Auxiliary chuan October 19, 2026 khan circular an chhuah a; BSI tihchhuah Bible tidanglama sumdawnna atana hmangte leh BSI aṭanga phalna la loa Bible mobile application siamte chu ti tawh lo turin an hriattir.

Bible leh Kristian Hla Bu te hi Mizote'n kum tam tak neiin kan lo hmang tawh a, tute'n emaw sumdawnna atan an hman thu hriat tur a awm meuh lo; tunah tidanglama sumdawnna atana hmang an awm tâk avanga BSI-in thuchhuah a siam a ngai ta hi a zialo hle.

Bible hi a bu awm dan kan duh anga mawi leh nalh a ni lo a niih pawhi, mahni duh dana tihdanglam mai chi a ni lo; Pathian lehkhabu a ni tih hriat reng a ṭha. BSI-in Bible hmélhmang leh a kâwm chi hrang hrang a an siam a, chungte chu kan duhthusama mawi leh nalh a ni lo a nih pawhin pawm mai hi kan tih tur a ni.

Bible hlui tawh, a kâwm emaw chhe tawh, khawi emaw siam ṭhattir te hi chu BSI-in an ngaimawh zingah a tel lo a; chuvangin, chutianga siam ṭhat tur neite tan chuan inthlahrunna tur a ni lo ang.

Lehkhabu rêng rêng hi buaipuitu, siamtu leh neitu nei a ni zel a; neitu nei rêng rêng chu mahni duh dan dana tihdanglam emaw, chhuah chhâwn emaw mai chi a ni lo. Bible hi buaipuitu leh siamtu an awm a, a siamtute phalna la loa lo tihdanglam a, tihdarh mai chi a ni lo; sumdawnna atana hman phei chu tih loh tawp chi a ni.

Tunlaiin mobile application a lar a, Bible leh Kristian Hla Bu te pawh mobile application a awm, a neitu leh siamtute phalnaa laa ti an ni nge ni lo hriat a ni lo. Thil dangah pawh a buaipuitute leh a kaihhnawiha thuneitute dàwr hmasa si loa application siam a awm nual tawh.

Bible a ni emaw, thil dang pawh ni se, mipui tana remchang leh ṭangkai a nih avang ngawta mobile application siam ngawt loh a ṭha. Dan bawhchhiatna a ni thei a, miin thubuaia an lak phei chuan buai phah hrep theihna a ni. Mobile application siam tur chuan a neitute emaw, a kaihhnawih thuneitute emaw phalna lak phawt zel a ṭha e.