Zirtirtu buaina chingfel thei tak maw?

Chief minister hoa tun hnaia Council of Ministers ṭhukhawm chuan, sorkar sikula zirtirtu transfer leh posting rules duan thar, "The Mizoram Education (Transfer and Posting of School Education Teachers) Ammendment Rules 2020 chu an sawiho hnuah an pawm. 

Mizoram harsatna tawh lian tak chu sorkar hnuaia sikul zirtirtu indaih ang­reng tak chung sia thingtlang sorkar sikul tam taka zirtirtu indaihlohna awm reng hi a ni a, zirtirtute hi sorkarin a mamawhna hmunah a dah hleithei lo. Sorkarna vawn fung chelhtu an inthlak hnuah pawh he harsatna hi an ching fel thei lo a, sorkar sikula naupang awm zat leh zirtirtu awm zat aṭanga chhuta zirtirtu indaih hle si a, a takah sikul tam takin ziritrtu an indaih lo ṭhin hle. 

Zirtirtute hian khawpui leh hmun nuam deuha awm an duh deuh vek a, chutiang tur chuan theihtawp an chhuah ṭhin. Hei vang hi a ni ngei ang, tun hnaia sorkarin zirtirtu a lak tharah pawh a hmuna awm duh ngei tur a khaw mi emaw, a khaw ṭhenawm mi emaw lak a ngai pawimawh hle a ni. 

Ngun taka chhut chuan sorkar hna­thawk ni si, sorkarin a mamawhna hmuna a sawn thei lo hi chu a zirtirtu lam thiam loh ni thui hle mah se, kan sorkar neih tawhte chak tawk loh vang a tih loh theih loh. Sorkar hnathawk chu sawn thiang an ni a, sorkarin ṭha a tihnaah a dah mai tur a ni a; nimahsela sorkar sikul zirtirtu erawh a sawn hleithei lo. Tunah chuan sorkar sikula zirtirtu transfer leh posting rules duan thar a ni ta a, Assembly Session-ah an pawm ngei beisei ila, hei hian Mizoram sorkar sikula zirtirtu buaina awm mek hi chingfel thei tak maw?