Chhêk-in project hlawhtling ngei se
Adviser to Chief Minister (Handholding) leh Mizoram State Policy Coordination Committee Vice Chairman chuan tun hnai khan nakkum 2027-a sorkar support price nena sawhthing lei leh hralh turah February - May chhungin hun hawn tum a nih thu a sawi.
MSPCC Vice Chairman hian sawrkarin thlai lei a buaipuinaah kum hmasa lama harsatna an tawhte aṭangin an insiamṭha zel tih a sawi a; hriat belh pawh eng emaw zat an nei a, chung aṭang chuan tih dan ṭha zawk tur an ruahman zel thu te, sawhthing hralh leh leia tih dan tur an ruahman tharte a sawi a ni.
Adviser to CM-in a sawi dan chuan, phai lamah sawhthing a thar hma a, phai lama mi an lei zawh hnu, April thla chawhnu lam aṭangin Mizoram lam an hawi chauh ṭhin.
April thla chawhnu lam aṭanga Mizorama sawhthing lei ṭan tak tak a nih hian, loneitute'n ringthar lamah hna an thawh a lo hun tawh a, harsatna eng eng emaw an nei ṭhin. Sawhthing buaipui bawk, ringthara hna thawh ngai bawk, an buai phah hle ṭhin a; mi tam takin sorkar ruahmanna páwn lamah a man tláwm zawkin sawhthing an hralh a ngaih phah ṭhin a ni.
Tun hma aṭanga Mizote'n tlang rama loneih kan kalpui dan leh a hunbi te hi tunah pawh a la danglam lem lo; lo vah hun, lo hâl hun, thlâm sak hun, thlai chi thlâk hun, hlo thlawh hun a la danglam lo.
Tlang ram loneiha hunbi mumal tak awm hi sorkarin a ngaih pawimawhsak a ṭul a; sawhthing chawh, hralh leh lei hun chungchangah pawh loneitute tan insiamrem a harsat avangin sorkar zawk a insiamrem a, remchang a siam a ṭul a ni.
Loneitute dinhmun hriaa sorkarin sawhthing thartute harsatnate sutkian a nih theih nana sawhthing chawh sate dahṭhatna tur 'Thlai Thar Chhêk-in' pilot project a duang hi a ṭha a; loneitute hunbi hre renga sorkarin ruahmanna a siam hi a lawmawm.
Sawhthing chawh sa dahṭhatna tur project hi sawhthing thartute'n sum leh paia an hlâwkpui bakah, hna an thawh dana an harsatna tam tak sutkian a nih phah ngeiin a rinawm. Chuvangin, Thlai Thar Chhêk-in project hi zùzî loa a hlawhtlin ngei theih nan sorkarin theihtawp chhuah rawh se.