YMA rorel bawhzui chak ni se

YMA chuan chawlhkar liam ta mai khan Aizawlah rorel inkhawm an nei a, thil chi hrang hrang an rêl a, chungte chu YMA thil, anmahni'n an bawhzui turte leh sorkar chêt ngaihna tur thilte a ni.

YMA rorel inkhawmin sorkar khawih thil a relte hi a pawimawh hlawm hle; Bairabi leh Sairang inkara rêl chawlhhmunahte uluk zawka ILP endik te, Mizoram leilung fate him zawkna atana sumdawnna kaihhnawih dan (trading regulation) ṭha zawk siam te, raltlante awm dan leh ram dang mi, dan loa Mizorama sumdawngte khuahkhirhna mumal zawk siam te a ni.

September 2025-a Sairang thlenga rêl a tlân ṭan aṭangin ILP chungchang hi mi tam tak ngaihven ber pakhat a ni; a pawimawh rêng bawk. Mizote hi pung ve hret hret mah ila, kan pung chak lêm lo a, state dangte ngaihtuahin kan la tlem hle.

Mihring tamna ber rama awm kan nih avangin kan awmna rama hnam dangte'n min chîm ral loh nan ILP hi pawimawh ber pakhat a ni. Khualzin rêl a rawn luh tawh avangin ILP khawng taka kenkawh a ṭul zual a; rêl chawlhhmun hrang hrangah khauh lehzuala ILP endik a nih theih nan theihtawp chhuah a ṭul. YMA leh sorkar lamin chak takin bawhzui tlang se.

Mizoram leilung fate him zawkna atana sumdawnna kaihhnawih dan (trading regulation) ṭha zawk siam YMA-in a rel pawh hi kan mamawh tak a ni. Mizoramah dan loa hnam dang sumdawng an tam sâwt hlea sawi a ni a, dan loa sumdawng ven nan dan ṭha zawk neih leh ṭha taka kenkawh a ṭul avangin, YMA rorel hi chak taka an bawhzui a ṭul ang.

Ṭhenawm ram aṭanga sahimna zawnga Mizorama rawn lutte hi kan Zo hnahthlakpuite an ni ber a, an rawn luh tirhin kan lo dawngsawng ṭha hle. Tunah erawh chuan hnawk tihna mipui rilruah a lian sâwt viau tih a hriat a; a chhan chu, an zingah dan loa thil ti ṭhin an tama hriat vang leh, leilung fate eizawnna an tibuaia hriat vang niin a lang. Raltlante hi mumal leh ṭha zawka khuahkhirh an ngai a, khuahkhirhna mumal tak neih a ṭul.

YMA hian rorel inkhawma an rorelte hi chak takin bawhzui se, sorkar lam pawhin theihtawp lo chhuah rawh se.