Lehkha chhiar uar zel a ṭul

Mizo Writers Association chuan October 16-24, 2026 chhung khan Vanapa Hall-ah Lehkhabu Pho Rûnpui vawi rukna an buatsaih a, ni riat chhungin lehkhabu chi hrang hrang Rs 16,63,780 man hralh a nih thu MWA chuan an tarlang.

Mizo mipui, a bikin ṭhalaite'n lehkhabu chhiar kan thatchhe tawh viaua sawi a ni ṭhin. Chutihlaia ni riat chhungin cheng nuai 16 chuang man lehkhabu hralh a ni hian Mizo zingah lehkhabu chhiar lama tui, lehkha chhiar uar tak tak an la tam tih a tilangah a ngaih theih. A lawmawm hle.

Hun eng emaw ti aṭang khan Mizote'n lehkhabu leh chanchinbu chhiar kan thatchhe sâwt viau ngeiin a hriat a; lehkhabu tichhuakte'n an hralh ṭha tâwk lo a, chanchinbu phei chu, hlâwkna pawh nei mang loin tam tak chu an kal hrâm hrâm a ni ber.

Mizote lehkha chhiara kan tlakhniam vakna aṭangin hma kan sawn leh hret tawhin a lang a, a lawmawm. IT, internet leh social media chak tawh tak karah hian lehkhabu leh chanchinbuah te hian hriatna leh finna tam tak a awm a ni tih hriain lehkha chhiar uar zual zel ila, kan sawn zelna tur a ni ngei ang.

Mizote hian ziakmi kan neihte hi kan ngaihhlut thiam a ṭul. Zaithiamte tan kan pawk a, sum sên kan huai hle ṭhin a; an tan hlâwkna a ni a, a ṭha, an lawmpuiawm. Chutihlaiin, thuziak turin mi kan sâwm ṭhin a, rilru sáwr bingin, ngaihtuahna tam tak séngin an ziak a, lawmman kan pek erawh a beitham hle ṭhin. Ziakmite hi ram leh hnam tana mi hlu an ni a, an tan hian insenso kan huam deuh deuh a ṭul.

Ziakmite pawh an ṭan zual zel a ṭul. Mizo ṭawnga lehkhabu chhuak tharte hian tun hma a tluk ta lo nge, a tluk chauh ni loin, tun hma aiin a ṭha zawk mah tawh zawk tih hi ngaihtuah tham a ni.

Chanchinbuahte hian ziakmi kan neih ṭhatte thu leh hla hmuh tur a váng tawh viau a, Mizo ṭawng inzirtirna lam thuziak pawh hmuh tur a tlem ta hle. Hei hi ṭhangtharte'n Mizo ṭawng an thiam loh chhan zingah a tel theiin a rinawm.

Kan ziakmite hi thuziak ṭha leh ngaihnawm zawk Mizo mipui hlui zel turin ṭang lehzual se, Mizo ṭawng humhalhna leh, mipui hnena Mizo ṭawng dik zirtirna lamah pawh tun ai hian an ṭan lehzual a ṭul e.