Hausa thutte ngaihsan loh a hun

Mizoram Police, Narcotics Control Bureau (NCB) leh Directorate of Enforcement (ED) te thawkho chuan ruihhlo do beihpui an thlâk a; ruihhlo tawlhrûknaa inhnamhnawih lian tak tak mi 18 chu October 23, 2026 khan an man. Man zinga mi pasarih chu Mizorama man niin, an zingah sumdawnna lian tak tak neite an tel.

Mizoram Home Minister-in press mite a hrilh danin, Mizoram, Manipur leh Assam state-a ruihhlo tawlhrukna chhu chat turin sorkar laipuiin beihpui thlakna, Operation Trident a ruahman a; chumi hnuaiah chuan Mizoram Police, NCB leh ED mi leh sate thawkhoin, ruihhlo tawlhruka inhnamhnawihte an chhui a ni.

Khawvel huapa ruihhlo tawlhrukna lian tham, Golden Triangle an tih kalkawngah Mizoram hi a awm a; hei vang hian Mizoram hi ruihhloin a kaltlang nasa a, hun eng emaw ti aṭang khan ruihhlo man thu chanchin tharah ni tin deuhthaw hmuh tur a awm. Ruihhlo tawlhruk kalkawng a nih rual hian Mizoramah ruihhlo chámbáng a tam hle bawk.

Mizoram leh ṭhenawm state-te harsatna hriaa sorkar laipuiin Operation Trident a kalpui hi a ṭha a; ruihhlo tawlhrûknaa inhnamhnawih lian tak takte Operation kaltlanga tun hnaia an man hi a ṭha tak a lawmawm.

Ruihhlo tawlhrûknaa inhnam-hnawihte man chhuah an nih zel theih nan ED, NCD leh Mizoram Police te hian theitawp chhuah zel se, nasa lehzualin ṭan la se; mipui pawhin kan theihna apiangah kan lo thlàwp zel tur a ni ang.

Kan state-a ruihhlo hluarzia hi Mizoram mite chauh ni lo, state páwn lam mi, chincháng ngaihven mite hriat a ni. Hetiang dinhmuna kan awm hi Kristian ram nihna nen a inhmeh lo a, a zahthlak zawng pawhin a ngaihtuah theih. Mahse, kan nihna dik tak a nih avangin zah hleihtheih a ni lo a, zak hman kan ni lo a, theihtawp chhuah takmeuha ruihhlo do hun a ni.

Mizoramah sum lak luhna hriat chian si loh hausa thut, in leh lo ṭha tak din, sumdawnna lian tak kalpui eng emaw zat an awma sawi a ni ṭhin a; man chhuah awm si loin, ruihhlo tawlh emaw, dan loa sumdawnna tia rinhlelh an ni fo. Sum lak luhna hriat mang loha hausa thutte hi kan ngaihsan loh a, kan endawng hial a ṭul tawh niin a lang.