CCM rorel leh ruihhlo do
Kohhran pakua thawhhona, Council of Churches in Mizoram (CCM) inkhawmpui vawi hnihna chu October 23-25, 2026 chhung khan BCM, Lunglei Venglai biak-inah neih a ni a; thil chi hrang hrang an rél.
CCM inkhawmpui rorelah hian ruihhloa sumdawng hriat chiante rawngbawlnaa hman loh te, ruihhlo donaa hmalak te, ruihhlo ngaite tana ṭawngṭai te, ruihhlo dotu pawlte suma ṭanpui te an rêl tih tarlan a ni. Mizorama ruihhlo hluar lutuk an vei hle tih a lang a, a lawmawm.
Rorelah hian, "Ruihhloa sumdawng man chhuah, sorkar leh court-in thiam loh a chantirte kohhranin rawngbawlnaah hman loh ni se. Heng mite hi an kohhranin a thunun a nih chuan CCM member-te chuan an kohhranah lâk luh loh ni se," tih a awm. Rawngbawlnaa hman loh ti hi thil chiang sa, kohhran tam tak kal dan sa reng a ni àwm e.
Ruihhlo kan tih hian narcotic drug kan kawhtir deuh ṭhin. Ruihhlo mai bakah, ruih theih thil dang - zu lama sumdawngte thlengin kohhran huang chhunga rawngbawlnaah hman an ni ngai meuh loin a hriat. Chutihrualin, CCM anga thumûm a awm theihna tura rêl a, thutlukna siam hi a ṭha a, tih àwm tak a ni.
Ruihhloa sumdawngte kohhranin a thunun a nih chuan CCM member-te chuan an kohhranah lak luh loh ni se, tih hian ngaihtuahna a tikal thui deuh. Kohhranin a thununte hi kohhran member an la ni reng ṭhin. Mahse, kohhran pawl dangah an lut/pêm a nih chuan an luh tumna kohhranah lak luh loh tur tihna lam a kâwk thei a; hei tak hi fimkhur ngai lai a ni ang.
CCM rorel dan aṭang hian ruihhloa sumdawng, dan hmanga roreltute'n thiam loh an chantirte leh kohhranin a thununte chu kohhran member-ah kan duh lo tihna a kâwk thei. Misual ber pawh lenna tura ngaih leh misualte'n chhandamna an chan theihna tura thawk tura ngaih kohhrante'n member atan lo duh loh chi an ni dawn em ni, tia ngaihtuah theih tak a ni.
CCM-in ruihhlo vei a, kan ramah ruihhlo a rêm theih nan leh ruihhlo donaa hmalak tuma thutlukna an siam hi a lawmawm. Rorelte hi ṭha tak leh chak takin bawhzui se, theihtawp chhuah se, kan rama ruihhlo hluar lutuk a ziaawm phah ngei a beiseiawm.