Thawktu lak leh induhsak bikna

Mizoram State University hnuaia group D (provisional employee) hna thawk turin Education Minister chhungkhat hnaivai leh rorel lai party-a inhmang chhungte lak an nia sawi chungchangin tunlai hian a lâr hle.

Eptu party ṭhenkhat chuan Education Minister chu a chhungkhat laina hnai duhsaka sorkar hnaa thunah an puh. Minister erawh chuan MzSU-a group D hna thawk tur laknaah induhsak bikna a awm loh thu leh, merit-a liau liaua lak a nih avangin an chhungte pawh ni se, hnâwl theih a nih loh thu a sawi.

Minister-in a sawi danin, MzSU atan hian post 71 siam a ni tawh a, chu'ng zinga post 21 chu lak phalna neih tawh niin, post 21 lak phal tawh zinga ṭhenkhat chu hnawhkhah tawh a ni. Hei vang hian MzSU din la ni lo mah se, group D tur ṭhenkhat lâk an ni hi thil àwm lo a ni lêm lo.

MzSU-a group D hna thawk tur lâknaah a changtu Minister laina hnaite an tling hi ngaihtuah thuak chuan induhsak bik vanga tling anga ngaih a àwm viau. Chutihrualin, a ti ṭha ṭha an tling a nih chuan, Minister lainá an nih avanga lak loh bik chhan tur a awm lo; Minister laina nih vanga hnâwl an nih chuan a 'fair' lo zawk ang.

Politics-a inbeihna anga thil a kal tawh chuan mipui tan thu dik hriat a harsa ṭhin. Eptu party-te thil sawite chu sorkar leh minister-te beihna ngawr ngawr anga ngaihna leh, sorkar lam aṭanga sawifiahnate pawh insawi thiam tumna maia ngaihna a lian tawh ṭhin. Tunah pawh eng nge dika dik lo mipui náwlpui tan hriat a harsa a ni.

Sorkar kal tawhtea hna laknaah chhungkhat lainate leh party mite duhsak bika lâk an lo ni fo tawh a; dan loa sorkar hnathawk tur lak an lo awm tawh ṭhin. Tuna sorkarah pawh mi hriat lêm lohin dan loa lak a awm reng tawh maithei.

Sorkar kal tawhte'n thil dik lo an lo tih tawh ṭhin ang pawh ni se, tuna sorkar mek lakah mipuiin beisei an nei sang bik a, an thîkthu a chhe bik a ni thei. Chuvangin, sorkar hi a fimkhur em em reng tur a ni a, sorkar hnathawk tur laknaah dan ang taka an kal dawn thu an sawi fo angin, duhsak bik nei loin dan ang takin kal zel rawh se.