Border Festival zing zawka tih ni se
October 29-30, 2026 chhung khan Mizorama Kolasib district leh Assam-a Cachar district mite tan Vairengteah Inter-State Border Festival buatsaih a ni. A ni khatnaah Counter Insurgency and Jungle Warfare School, Vairengte Commandant-in a hawng a, a ni hnihna chu Mizoram Assembly Deputy Speaker-in a hmanpui.
Border Festival hi Mizoram leh Assam mipui inkarah inkungkaihna leh inṭhian ṭhatna ṭha zawk a awm theih nan te, hnam nunphung inhriat chian tawnna atante buatsaih a ni a; hnam lâm leh zai te entir a nih bakah, intihhlimna atan infiamnate buatsaih a ni. Self help group-te leh sorkar department-te'n stall eng emaw zat siamin, Mizo kutchhuakte leh thlaite an pho chhuak bawk.
Ramria chêngte inkara inunauna ṭha zawk a awm theihna tura kût buatsaih a ni hi ṭha em em a; hetiang tura sorkar lama thuneitute leh a bawhzuitute'n ngaihtuahna nasa tak sénga hma an la hi a lawmawm tak zet.
Hnam nunphung, zia, chìn dan, kalphung leh rilru puthmang inhriatsak hi a ṭha a; inkungkaihna ṭha nei tura pawimawh a ni. Buatsaih a nih chhan ang takin Festival hian state pahnih mipui inkarah inhriatthiam tawnna, inṭhian ṭhatna leh inkungkaihna ṭha zawk thlen ngei se a duhawm.
Inhmuh tam, thil tihho tam leh inhriat chian hi innêlna leh inkungkaihna ṭha siamtu a ni. Chhungkhat laina hnai tak pawh inhmu ngai lo, inbe ngai lo chu innêl a harsa a, a inpawh tak tak theih loh a, inkungkaihna a ṭha thei lo. Thisena inzawmna nei miah lo pawh thil tiho tam chu an inpawh a, an innêl a, an inngaina ṭhin.
India ram hi a keh darh emaw, thil inthlâkthleng nasa tak a thleng a nih ngawt loh chuan Mizoram leh Assam hi inṭhenawm reng tur kan ni a, a chhunga chêng mipui pawh kawng hrang hranga inmamawh tawn reng tur kan ni. Hei vang hian state pahnihte hian inkungkaihna ṭha kan neih a, kan inhriathiam tawn a ngai; hmelma anga inen tur kan ni lo.
Mizoram leh Assam state mipuite'n inkungkaihna leh inṭhian ṭhatna ṭha zawk kan neih theih nan hmalak zui zel ni se. State pahnih mipuite tana thil tihho theih tur buatsaih fo ni se, Inter-State Border Festival ang chi pawh zing zawka buatsaih theih ni se a duhawm hle a ni.