CM-in LC-te a fuihna ṭawngkam

Chief Minister chuan October 29, 2026-a Aizawl City Local Council Association General Assembly vawi 4-na a hmanpuinaah local council member-te fuihna leh local council-te laka a phût chi hrang hrang a sawi.

CM hian LC-te chu an huam chhungah ruihhlo do a, an veng thian thianghlim turin a chah a; bengchheng taka bike-a tlan chíngte leh insual rawn chíngte chu sawp hrep mai turin a fuih. Mizo hming hmanga sumdawngte lakah te, sumdawnnaa bûkna leh tehna dik lo hmangte lakah hma la turin a chah bawk.

Chief Minister-in LC pungkhawm hmaa a sawite hi ngaimawhawm tak a ni hlawm a; mipui náwlpui leh pawl ṭhenkhatte'n an ngaimawh em em a ni tlangpui. A sawi dan ṭhenkhat erawh vantlang hriata ram hruaitu lu ber sawi atana mawi lo deuhin a lang a; sorkarin dan bawhchhiatna hrang hrang a vil hneh lohzia leh a vèn hneh lohzia tichiangtuah a ngaih theih.

Ram hruaitute chuan pawi khawihtute man theitute leh hrem theitute an hre chiang hlein a rinawm. Sual dona lama CM ṭhahnemngaihna a lawmawm rualin, 'lo man ula, lo sawp hrep ula...' tih ṭawngkam a hmang erawh, dan pêla che tura infuihna a nih theih avangin a mawi lo deuh em aw, a tih theih.

Sualna chi hrang hrang donaah dan ang diak diaka kal dawn chuan do hneh a harsa fo a, dan pêl deuha chêt a ṭul hun pawh a awm thei àwm e; mi tam tak ngaihdan pawh a nih a rinawm. Mahse, ram hruaitu, ram danpui hnuaia chhechhamtute tan erawh chuan dan pêla che tura vantlang hmaa mi fuih erawh a fuh lo thei. Vantlang hmaa ṭawngkam hmanah fimkhur hle a ngai.

Mi dang tana ninawm leh harsatna siam khawpa ringa bike tlân ṭhin te, dàn loa sumdawng te, sumdawnnaa bûkna leh tehna dik lo hmangte titawp tura mawhphurtu lian ber chu sorkar a ni a; sorkar chak leh chak loh hriltu pakhat a ni.

Heng dan bawhchhiatnate hi titawp turin sorkar hian ṭan la lehzual se, mawhphurtute pawh tichak lehzual rawh se; tumna tak tak nen bei se chuan a tirêm vek lo a nih pawhin, tun aia tlem fe-ah a titlahniam thei ngei ang. CM-in a fuih angin, LC-te pawhin tun aia chak zawkin an huam chhung ṭheuhah hma an lak a ngai bawk; tualchhunga hmalakna hi a pawimawh berte zinga mi tho a ni.