Education department thuchhuak zawm ngei rawh se

School Education department chuan tun hnai, October 26, 2026 khan social media hman danah zirlaite leh zirtirtute zawm tur pawimawh tak tak a tichhuak.

Mizorama sikul tam taka zirlaite che vel social media-ah hmuh tur tam tak a awm a, hmuhnawm deuh te, hlimawm leh nuihzatthlak tak takte a ni tlangpui. Ṭhenkhat erawh chu ngaihtuah tithui tak tak, mi nawlpui hmuh atana ṭul lêm lote a ni bawk.

Sikul eng emaw zat chuan social media-ah account/page an nei a, thlalak leh video te an dah ṭhin. Social media-ah mahni sikul leh zirlaite thlalak/video dah ṭhinah hian a ṭha leh him chin a awm rualin, a ṭha lo leh him lo chin a awm. Ṭha leh ṭha lo, him leh him lo chinte zirtirtute'n an thliar thiam hle a ṭul.

Sikul chêt ṭhatna, chìn dan ṭha leh chhuanawmna lai te, zirlai chhuanawm bikte chanchin leh thlalak, mi dangte'n an entawn atana ṭhate chu mi tam zawkin an hmuh theih nan social media-ah dah a ṭha maithei. Zirlaite chêt chhiatnate leh nuihzatthlak laite dah chungchangah erawh fimkhur hle a ngai - dah loh ni se a ṭha zawk tlangpuiin a rinawm. Tuna nuihzatthlak leh hlimawm takte hi nakina zirlai nun tibuaitu, harsatna leh zahna thlentu a ni thei tih hriat a ṭha.

Zirlaite hmakhua ngaia School Education Department-in sikul, zirtirtu leh zirlaite tana social media-a tih tur leh tih loh tur mumal tak a siam hi a lawmawm tak zet. Thuchhuak zawm a nih leh nih loh vil zui se, sikulte social media account/page-te enfiah ṭhin se a ṭha hle ang.

School Education thuchhuak hi sikula zirtirtu zawng zawngin an zawm mai bakah, an bawhzui a ṭul. Zirtirtute'n an tih tur leh tih loh turte ṭha taka an zawm a ṭul piah lamah, zirlaite'n an zawm turte pawh mahni sikulah ṭheuh khawng taka an kengkawh a ngai.

Phone leh a kaihhnawih thilte hman chungchangah zirlaite khuahkhirhna, tih tur leh tih loh tur eng eng emaw a awm. Naupang tam tak chu an tana ṭha leh ṭha lo pawh ngaihtuah lem lo, nuam an tih ang anga awm mai an ni a; a rûka thil tih duh an ni fo. A rûka thil ṭha lo leh phal loh thil an tih lohna tura khuahkhirh chu zirtirtute mawh a ni.