Hmùi chauh ni lo, thil tiha eirûkna do
October 26 - November 1, 2026 chhung khan India ramah eirûkna leh hlemhlêtna dona leh a ṭhat lohzia inzirtirna chawlhkar, Vigilance Awareness Week hman a ni a, Mizoramah pawh hmun hrang hrangah uar taka hman a ni.
Vigilance Awareness Week pual hian October 28, 2026 khan Vanapa Hall-ah hun hman a ni a, Chief Minister khuallian niin, thu pawimawh tak tak a sawi. October 31 zing khan Aizawlah Walkathon buatsaih niin, corruption ṭhat lohzia tlangaupui a ni bawk.
Vigilance Awareness Week hmanna hrang hrangah hian eirûkna leh hlemhlêtna ṭhat lohzia te, ram ṭhan tiṭhutu a nih dan te, hmasawnna dâltu lian tak a nih dan te sawi a nih bakah, eiru lo tura intiamna thute sawi rual a ni a; inzirtirna atan debate te pawh buatsaih a ni.
October 28-a Vigilance Awareness Week hmannaah Chief Minister chuan, ṭawngka ringawta corruption do loin, kalphung ṭha zawk nen an do mek thu te, Mizoram chu corruption-ah a fihlim chuan hma a sawn dawn thu te, corruption do rêm turin mi tinte an ṭan rual a ngaih thute sawiin, corruption dopuiah mipui a sáwm.
Mizorama sorkar ding tawhte'n eirukna leh hlemhletna do kawngah an phâk tâwk ṭheuhin hma an la vek a, an phâk tâwk nia an hriat leh hma an lak chin erawh a inang lo. Sorkar ding tawh ṭhenkhat chu eirukna do tak tak lo a, a vulh liantu zawka mipuiin an ngaihte pawh a awm theih viau tho maithei.
Mizoram hi corruption awm lohna ram ni thei se duhthusam a ni a, chutiang tur chuan mi tinin mawhphurhna kan nei. Sorkar siamtute leh sorkar hnathawkte mawhphurhna a sang zual a, ṭawngkaa ringawta do loin, thil tih hmanga dotu leh a taka eirûkna laka fihlim an nih a ṭul. Vigilance Awareness Week-a thutiam an sawite pawh a taka zawmtu an ni ngei tur a ni a; kumin Week hman hian intiamna puitling paw chhuak ngei rawh se.
Sorkar hotu leh sorkar hnathawk ni ve lo mipui náwlpui pawhin mawhphurhna an nei. Corruption-a inhnamhnawih ni ngeia miin an ngaih rawn te, dan loa sumdawnga hausa ta viaute hi mipuii an hnâwl a hun tawh. Eirûkna leh dan loa thil tih vanga hausate sum leh paia khawtlang tana an inpeknate hi hnar ngam a ṭul tawh a ni.