Hâlpuahah hmalak tak tak a hun

Home department, Mizoram Police, district administration leh department ṭhenkhat hotute leh Central YMA leh MIMA hruaitute chuan November 3, 2026 khan Home Minister hoin kumin hunpui laia hâlpuah hâl a nih loh dan tur leh, hâlpuah leh hâlmawi khuahkhirhna dan - The Mizoram Fireworks Regulation Act, 2026 (MFRA) kenkawh dan tur an rêl.

MFRA chungchang zau zawka mipui hnena puanzar dan tur leh chumi atana chanchinbumi te, kohhrante leh khawtlang hruaitute hman ṭangkai dan tur te, Krismas vuakvêt hmaa state páwn aṭanga hâlpuah leh hâlmawi rawn lut tur dang tura hmalak dan tur te, a ṭhat lohzia inzirtir dan tur leh hâl lo tura mipui hneh dan turte sawiho a ni.

Home Minister chuan, hâlpuah leh a kaihhnawihte khuahkhirhna dan khauh tak kalpui aiin, halpuah hâl nghawng ṭha lote inzirtir paha hâl lo tura inngenin awmzia a neih thui zawk a beisei thu a sawi.

MFRA hi hâlpuah leh a kaihhnawihte khapna dan thar a ni a, August 26, 2026 khan Legislative Assembly-ah pawm a ni. He dan hian halpuah leh a kaihhnawihte kawl, zawrh leh hâl a khap a; dan bawhchhiate hremna mumal tak a awm a, sorkar hnathawkte hremna a na zual.

Hâlpuah khapna thupekin a khap hneh zo lo tih kum kal tawhte aṭangin a chiang a, khap a ni ziah chungin Aizawl leh district khawpui dangahte nasa taka hâl a ni zel tho. A lehlamah, khawng taka khap lêm loin, inzirtirna leh ngenna hmangin a hlawhtling thei tih a hriat tawh bawk.

Tun hnaia thuneitute ṭhutkhawma Home Minister-in a sawi ang hian, hâlpuah leh a kaihhnawihte hâl ṭhat lohna te, mihring leh ran hriselnain a tawrh theih dan te, ṭangkaina nei lo a nih dante hi uar lehzuala inzirtir ni se.

Hetihrual hian, hâlpuah leh a kaihhnawihte ṭhat lohzia inzirtirna hi a tam tawh viauah pawh ngaih theih a ni a, mahse, chungte chuan mipui thinlung a la hmin tâwk lo a ni thei. Beidawng mai loin, mipui thinlung hneh theih dan tur uluk lehzuala ngaihtuah zel a ngai tihna a ni.

Krismas leh kum thar hunpui kan hnaih zel a, heng kan hunpuiah hian hâlpuah hâl a nih loh nan sorkarin hmalak chhoh a tum tih a lang. Hâlpuah chungchangah eng hawi zawng pawhin hmalak ni dawn se, tun aṭangin theihtawp chhuaha hmalak a hun e.