Taxi khalhtute fimkhur lehzual se

Sports & Youth Services Minister chuan October 20, 2026-a Aizawla taxi khalhtute tana futsal inelna a hawnnaah taxi khalhtute a fuih a, taxi khalhtute chu ram leh hnam hmél lanna an nih avangin an nun dan uluk turin a chah.

Minister hian, "Kan rama khualzin pung mekah taxi khalhtute'n mawhphurhna sang tak in nei a, khualzinte'n an tawn hmasak ber in nih ṭhin avangin ram leh hnam hmingṭhat leh hmingchhiat in kutah a awm lian hle a ni," tiin a hrilh a; nun dan uluk a, ruih theih thil laka fihlim a ṭul thu a sawi.

Mizoramah hian taxi driver-te hi mâwl tih an hlawh fo a, state dangahte pawh a ni maithei. Mâwl tih an hlawh fo chhan hi an chêt dan avanga miin an sawi dan a ni ber a; mahse, hei hi an nihna a ni vek lêm lo.

Taxi khalhtute zingah hawihhâwm, fel leh rinawm, nun dan mawi taka nung tam tak an awm. Chutihrualin, hawihhâwm lo fe fe, mahni remchanna leh awlsamna chauh ngaihtuah nia lang, mi dang tana harsatna siam hreh lo eng emaw zat an awm ve bawk. Chutiang mite chuan taxi khalh ṭhin mi ṭha leh fel tak takte an tihmingchhe ṭhin.

Lirthei khalh hian chapo a awl a ni maithei a, nun dan mawi lantir harsat ta tlatte pawh tam tak an awmin a lang. Thil danga hawihhâwm, mi dang ken nachâng hre tak si, lirthei khalh laia hawihhâwm hleithei lo, chuhhelh ta tlat ṭhin tam tak an awm niin a hriat. Lirthei khalh lai hian mi tinin dawhtheihna kan mamawh hle.

Sports Minister-in a sawi angin, taxi driver-te hi khualzinte'n Mizo zinga an tawn hmasak leh an biak hmasak an ni fo a, anmahni aṭangin Mizo leh Mizoram nihna leh dinhmun an teh foin a rinawm. Chuvangin, taxi driver-te hian an nun an uluk a ngai a, hawihhâwm leh nèlawm taka mipui an dawnsawna an dàwr ṭhin a ṭul.

Taxi driver-te hian an remchanna ringawt an ngaihtuah tur a ni lo a, mi ngaiha mawi leh ṭha ngaihtuahin, a taka an lantir a ngai. Inthuamna leh incheina thlengin an phâk tâwkah an uluk a ṭha a, thawmhnaw fai ṭha tak an inbel ṭhin a ngai a ni.