Mizoram mau dinhmun

Mizoram Science, Technology & Innovation Council (MISTIC) leh Council of Scientific and Industrial Research Advanced Materials and Processes Research Institute (CSIR-AMPRI), Bho­pal-te chuan, tun hnai khan mau chanchin leh hman ṭangkainate zirhona, 'Bamboo composite materials for structural appli­cations'  an huaihawt. He zir­honaah hian Mizoram zau zawnga 32.07% chu mau awmna hmun a ni a, Mizoram mau awm zinga 95% chu Melocanna Baccifera (mau-tak) niin, India rama mau chìnna hmun zinga 14% chu Mizorama awm anga chhût a nih thu sawi lan a ni. 

Mithiamten Mi­zorama mau awm zat leh a dinhmun dik tak an zirchiannaa thil an hmuh chhuah hian ngaih­tuah a tithui hle a, heti raka mau tamna ram kan lo nih dan hi a chhunga chengte pawh hian kan hre chiang vak awm lo e. Mizorama ram 32.07% zet chu mau hmun niin an sawi a, he ramah hian mau hi kan nei hnem viau a ni. India ram pumpui aṭanga chhuta mipui kan tlem dan ngaihtuah phei chuan, India rama mau chìnna hmun zinga 14% chu Mizorama awm anga chhût a ni hi a mak hial a, he ramah hian mau a lo tam takzet a ni. 

Kan state hotupa ber, kan chief minister chuan mau ni loin rua zawk chu flagship programme a nih thu a puang tawh a, mau/ rua hmanga Mizoram economy khai chhuah a tum thu a sawinaah IAS meuh pawhin an hna bansana rua/ mau an buaipui duh a rin hial thute a sawi. Kan sorkar lam hi chuan tuna mau awm sa ṭhahnem tak hi an tuipui teh chiam lo niin a lang a, hmun dang aṭanga a chi lakluh a, kui ṭiah a, tihpun lam an sawi mawi mek. A chi hi lei a ngai phawt a, kui ṭiah a ngai ang a, phun nun a ngai leh ang a, hei hian hun leh tha a la duh deuh ngei ang. 

Mau/rua lakluh chawpa chin puitlin hi thil theih ni mah se, kan rama tualṭo maute hman ṭangkai dan zawn mai hi kan hlawkpui thei zawkin a rinawm a; heti zat mau kan neihte hi kan hmang ṭangkai lo a nih si chuan, kan lakluh chawp tur hmanga intodelh hi chu thil theih loh ni lo mah se thil harsa tak chu a ni ngei ang.