Khawpui ralmuang siam a ṭul

Superintendent of Police, Aizawl chuan November 2, 2026 khan thuchhuah siamin, khawlaia insual buai chíngte lakah a na thei ang berin action lak zel tum a nih thu a tarlang.

Aizawl SP hian Pathianni kal ta zanlai pelh hnua Bawngkawn leh Ṭhuampui inkar kawngpuia insual buaina thlenga inhnamhnawih mi 10 lai man an nih thu leh thubuai siamsak an nih thu an tarlang a; chumi rual chuan "Khawlaia insual buai ching lakah a na thei ang bera action lak zel tum a ni," a ti.

Social media a chak tawh avangin tun hnaiah khawlaia insual buai lai thlalak (video) hmuh tur a awm fo a, intihbuaina ṭhenkhatah phei chuan thih phahte pawh an awm. Hetiang thil thleng hriat tur leh hmuh tur a awm leh ṭhin hi a zialo a, thleng tawh lo thei se a duhawm.

Khawlaia insual buai chíngte lakah police-te'n a na thei ang bera action an lak zel dawn thu SP, Aizawl-in a puang hi a lawmawm a, mipui tan a thlamuanthlak. SP sawi ang hian, police-te'n chak takin hma la zel rawh se.

Buaina thleng a awmin, a rang lama ERSS number 112 leh police station-ah hriattir zel turin Aizawl SP-in mipui a ngen. SP ngenna hi hre reng ila, kan hmuh leh hriat phâkah buaina a awm a nih chuan police hnenah hriattir vat zel ila, buaina chhuak ṭhin tihtlemna kawngah awmzia a neih bakah, police hna tiawlsamtu a ni ang.

Kan phone-a thlalakna ṭha tak tak awm hi a ṭangkaina tur chinah chuan hman ṭangkai thiam a ṭul. Phone-a thla an lo lakte hi police tan hnu chhuina tiawlsamtu a ni ṭhin avangin, buaina, pawikhawihna leh harsatna thlengah police hnena hriattir hlamchhiah si loa tih chi tak a ni.

Intihbuai te, buaina siam te, insual rawnte hi a hmânlai tawh a, hnam changkâng lo leh rilru hniam zia a ni. Hmanrua leh bungrua lamah khawvel changkanna hrang hrangte kan neih zel karah hian kan rilru pawh kan tihchangkan tel a ngai.

Mizoram khawpui ber hi intihbuai fona hmunah a chan kan phal tur a ni lo. Mipui mimir, naupangte leh hmeichhiate thlamuang tak leh ngaihngam taka khawlaia an kal ngamna khawpui ralmuang a nih theih nan venhimna lama mawhphurtute'n an tih tur tak ti zel se; mipui pawhin kan tih theih chinah ṭan kan lak zel a ṭul e.