Hun bitukah thlai lei ṭan ngei a ṭul
Mizoram Agriculture Marketing Board (MAMB) hotute November 2, 2026-a ṭhukhawm chuan, sorkarin thlai hralh leh leia a inrawlhna bika thlai lei dan tur an ngaihtuah a; thlaite lei turin sorkar a inpeih tawh tih tarlan a ni.
Agriculture Minister sawi danin, kum danga January aṭangin sorkarin hmarcha ro hralh ṭan tura a tih ṭhin chu hmarcha thartute'n a tlai an tih deuh avangin kuminah chuan December 2026-a lei ṭan tura tih a ni. Sorkar ruahman ang chuan, February-May, 2027 inkarah sawhthing lei tum a ni a, February-March 2027 chhungin aieng leh hmunphiah lei tum a ni bawk.
Thlai thlan bikah hian sorkarin a man tur a bituk a; sorkarin a bituk zat anga a leitute'n an ngam loh chuan, an ngam lohna zat chu sorkarin minimum support price hmangin hnawhkhah zel a tum a ni.
Agriculture & Farmer Welfare Minister-in thlai an thlan bikte lei tura sorkar a inpeih tawh thu a sawi hi a ṭha hle mai a, kut hnathawktute tan a lawmawm hle ngei ang. Minister berin a sawi tawh a, a sawi ang takin ruahman hunah lei nghal chat theih ngei a ṭul dawn a ni.
Sorkarin thlai a thlan bikah hian mipui ngaihven ber chu sawhthing a ni a, loneitute'n an chìn tam ber a nih vang leh, thar chhuah pawh a tam ber vang a nih a rinawm. Kum hmasa lamah sorkarin lei/hralh ṭan hun tur a tihah kut hnathawktute'n an hralh thei lo tawh ṭhin a; chu chuan loneitute a tilunghnûr a, harsatna a thlen a, politics-a inbeihna a titam bawk.
Kan hma lawka thlai seng a hun leh hunah chuan, thlai lei ṭan hun tur Minister-in a hun a sawiah loneitute'n thlai an hralh ṭan ngei theih nan tun aṭangin ngawrh takin an inbuatsaih tur a ni. Harsatna awm thei hrang hrang ngaihtuah chungin, invenna leh inhmakhua theihna apiangah hmalak lâwk ni rawh se.
Kum hmasa lamah sorkar ruahmanna anga sawhthing hralh hun nghak zo lo a, sumdawng dang hnenah sorkar rate siam aia hniam féa hralh mi eng emaw zat an awm a; chutiang chu a thlen tawh loh nan sorkar hi kawng tinrêngah a inhmakhua a ṭul. Hriat lâwk loh leh pumpelh theih loh harsatna a awm erawh chuan inhriatthiam a ṭha.